Úlfar Þormóðsson 05/03/2016

Vökumenn óttans

Óttaslegnu Íslendingunum gengur ekki nógu vel að hrella landann til liðs við sig. En nú er bjart framundan. Þeim hefur hefur borist liðsauki erlendis frá.

Jón Gnarr

Vísir.is birti frétt í gær (4.mars) undir hrollvekjandi fyrirsögn:  Ísland verður að vera búið undir það versta. Þetta var haft eftir Peter Anthony Berlac, sem er yfirlæknir utanspítalaþjónustu í Kaupmannahöfn.

 

Í fréttinni er minnt á að skotárásir voru gerðar í Kaupmannahöfn í febrúar í fyrra. Einn var að verki og tveir létu lífið. Síðan hefur mikil vinna „farið fram í Danmörku við að skoða viðbragðskerfi nágrannalandanna við hryðjuverkum og draga af þeim lærdóm,“ segir Berlac og bendir á að „mikilvægt (sé) að á öllum stigum kerfisins fari fram æfingar og andlegur undirbúningur, jafnvel fyrir atburðum sem kunni að virðast óhugsandi.“

Björn og norrænir munir

Fréttinni lýkur á þessari klausu, sem höfð er eftir doktornum: „Og það sem Ísland þarf kannski sérstaklega að hafa í huga er áætlun um hvernig hægt væri að fá hjálp að utan. Því ef meiriháttar atburður verður hér þá yrði það ykkur sennilega ofviða, svo þið verðið líka að hugsa um utanaðkomandi hjálp. Það versta sem þið getið gert er að stinga höfðinu í sandinn og segja að ekkert muni gerast hér í Norður-Atlantshafinu. Þið verðið að vera búin undir það versta.“

Innflutningur á ótta er tímabær; við hér erum allt of værukær. Því hvað skal gera ef og þá og eftirá? En það væri ósanngjarnt að segja að þjóðin sé öll sinnulaus í þessum efnum. Björn Bjarnason, fyrrverandi ráðherra er vökull. Hann er stöðugt á hræðsluvaktinni. Í bloggi sínu í gær, 04.03. ´16, skrifar hann um dagsgamla samþykkti borgarráðs um þátttöku Reykjavíkur í stofnun Friðarseturs, Höfði – Reykjavík, í samstarfi við Alþjóðamálastofnun Háskóla Íslands. Það sem vekur ótta hans er að við blasir að Jón Gnarr, fyrrum borgarstjóri verður formaður ráðgjafanefndar setursins, sami maður og taldi „það meðal annars skref til friðar að banna vinveittum herskipum að heimsækja höfuðborg Íslands“ segir þessi vökumaður óttans. Þetta er skelfileg framtíðarsýn fyrir síhrædda.

 

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,726