Vitrán

Nú eru báðar vonarstjörnur Framsóknarflokksins, Sigurður Ingi og Lilja Alfreðsdóttir, komnar á Nató-fund sem haldinn er í Póllandi. Þau eru hernaðarsinnar. Aðalumræðuefni fundarins er endurnýjun hergagna.

Að vera hernaðarsinni eru trúarbrögð. Eins og með önnur trúarbrögð er guð hernaðarsinna ósýnilegur; hann kemur ekki á samkomur sér til dýrðar og það þekkir hann enginn nema af afspurn. Heittrúaðir hernaðarsinnar með þá menntun og þekkingu sem vonarstjörnurnar hafa vita þó hver hann er. En þau trúa þvert á þekkinguna. Þau vilja halda að guð þeirra sé friðboðandi. Og fá sig til þess að trúa því. En þau vita eigi að síður að hann er vopnaframleiðandi. Sá sem þarf að selja framleiðslu sína, hvort sem verksmiðjur hans starfa vestan eða austan landamæra Póllands. Og íslensku vonarstjörnurnar munu greiða atkvæði með endurnýjun vopna, með auknum innkaupum Nató-herja á nýtísku hergögnum. Og það munu trúbræður þeirra, stuðningsmenn Pútíns, Rússlandsmeistara einnig gera. „Fyrir friðinn“, syngur trúin þeim austan haf og vestan og kæfir vitið líkt og hún hefur gert um aldir.

Hergagnaframleiðendur leika á fólk, spila með tilfinningar hinna hræddu, hrella þá inn í trúflokkinn og halda þeim þar. Einn slíkur, vel menntaður, margsigldur með mikla þekkingu er Björn Bjarnason, fyrrverandi menntamálaráðherra. Hann er ofurhræddur, alltaf, og vill vopnvæða íslensku lögregluna af ótta við útlendinga og auka hernaðarumsvif Kanans á nýjan leik, vegna ofurhræðslu við Rússa, sem þó eru trúbræður hans í friðarmálum með vopnavaldi, og hafa sömu stjórnmálaskoðanir og hann sem kristallast í einkavæðingu ríkiseigna og dekri við auðjöfra.

Rök hrína ekki á hræðslunni frekar en trúnni. Hræddi-Björn skrifaði í gleðivímu í netdagbók sína 5. júlí síðast liðinn, nokkrum klukkustundum eftir að utanríkisráðherra hafði undirritað yfirlýsingu, sem fullyrða má að feli í sér heimild fyrir ameríska herinn að setja upp herstöðvar hérlendis:

„Kenningin um að ekkert skuli gert til að tryggja hernaðarlegt öryggi Íslands hefur lengi verið reist á þeim rökum að varnarleysi þjóðarinnar kallaði fram friðsamlegt umhverfi hennar. Nú eru 10 ár síðan varnarliðið hvarf úr landinu. Leiddi brottförin til þess að kenningin um friðsamlega umhverfið rættist? Nokkrum mánuðum eftir brottförina hófu Rússar herflug í nágrenni landsins og nú eru kafbátaumsvif þeirra í nágrenni landsins meiri en þau hafa verið í 30 ár. Kenningin kolféll þegar á reyndi.“

Það er merkilegt, reyndar ótrúlegt, hvernig trú hins síhrædda rænir hann vitinu. En það er líka sorglegt.