Vísismenn gerðu tilboð í blokk í Grindavík til að flytja þangað fólk frá Djúpavogi. Fá kostnaðinn dreginn frá veiðigjaldsgreiðslum

Forsvarsmenn útgerðarfélagsins Vísis í Grindavík höfðu samband við Íbúðalánasjóð í því skyni að kaupa af honum blokk að Stamphóli 3 þar í bæ. Ætlunin var að leigja út íbúðirnar.

Þetta var um sama leyti og tilkynnt var um lokun vinnslustöðva á Djúpavogi, Húsavík og Þingeyri og fólki þaðan boðið að flytja til Grindavíkur. Vísismenn lögðu fram tilboð í húsið í nafni óstofnaðs einkahlutafélags.

Frá þessu greinir Úlfar Þormóðsson rithöfundur í grein í Herðubreið.

Nokkrar fjölskyldur fóru frá Djúpavogi til Grindavíkur á dögunum til þess að skoða íbúðirnar og einhverjir munu þegar hafa ákveðið að flytjast búferlum.

Samkvæmt nýsamþykktum lögum um veiðigjald er útgerðarfyrirtækjum heimilt að draga frá kostnað við óskyldan rekstur og fjárfestingar áður en til útreiknings veiðigjaldsins kemur, eins og Indriði H. Þorláksson fyrrverandi ríkisskattstjóri benti á í grein í Herðubreið.

Sjá grein Úlfars hér.