Vill utanríkisráðherra hleypa Bretum aftur inn í landhelgina? Tveir reyndir stjórnmálamenn spyrja

Lilja Dögg Alfreðsdóttir sér tækifæri fyrir Ísland í því, ef Bretar fylgja ekki lengur sameiginlegri sjávarútvegsstefnu ESB. Hvað merkir það?

Að því spyrja tveir reyndir stjórnmálamenn, Björn Valur Gíslason varaformaður Vinstri grænna og Össur Skarphéðinsson fyrrverandi utanríkiráðherra.

Björn Valur skrifar meðal annars í grein:

„Heldur ráðherrann kannski að tækifærin liggi aðeins Íslandsmegin? Að mögulegt samstarf við Breta í sjávarútvegsmálum verði eingöngu á forsendum Íslands og á kostnað Bretlands? Þannig yrði það auðvitað aldrei. Tækifærin sem ráðherrann sér í mögulegu samstarfi þessara ríkja í sjávarútvegsmálum geta aldrei orðið einhliða. Þau hljóta alltaf að verða gagnkvæm.

Hvenær varð þessi stefnubreyting og umsnúningur hjá framsóknarflokknum í vörninni fyrir Ísland gegn ásókn erlendra ríkja í auðlindir hafsins í kringum landið?“

Össur sagði þetta m.a. á facebook í gærkvöldi:

„Í fyrsta lagi er það vafasöm nálgun, og ólíklegt að henti hagsmunum Íslands, að gera tvíhliða samning við Breta fremur en beita afli og þunga EFTA, þar sem miklu ríkari og þyngri hagsmunir eru undir sem hægt væri að virkja í þágu íslenskra hagsmuna. Það er einfaldlega ekki sérlega góð hugmynd.

Í öðru lagi er öllum hollt að muna að málaferli eru í gangi í Bretlandi um það hvort Bretar geti virkjað útgönguákvæðið án þess að breska þingið veiti May forsætisráðherra umboð til þess. Vinnist þau gæti það leitt til falls stjórnarinnar áður en af Brexit verður.

Þetta eru þó smáatriði hjá hinu þriðja. Það er barnaskapur að ætla að Íslendingar geti fengið veiðiheimildir innan bresku lögsögunnar án þess að um gagnkvæmni verði að ræða. Bretar munu að sjálfsögðu krefjast á móti veiðiheimilda innan íslensku lögsögunnar. Þannig eru lögmál svona samninga. Það myndi einfaldlega aldrei fljúga á Íslandi. Aldrei.

Eftir landhelgisstríðin, og viðurkenningu ESB á að innan þess yrði Ísland sérstakt fiskveiðistjórnsvæði, er hver sá ráðherra sem talar með þessum hætti á glerhálum ís.“