Úlfar Þormóðsson 01/09/2016

Verðbólgubónus

Í þeim hneykslunarflaumi sem fallið hefur – og fellur enn – vegna ofurbónusa þrotabúa föllnu bankanna til sölumanna sinna hefur enginn bent á það enn að hin árangursríka og verðlaunaða sölumennskan veldur verðbólgu. Því hærra verð sem fæst fyrir eignir þrotabúsins, þeim mun hærra verð myndast á samsvarandi vöru á „frjálsa“ markaðnum. Verðlag hækkar, verðbólga eykst.

Peningar, auðmenn

Þetta á líka við um tuttugu og fimm prósent bónusana til valinna bankamanna sem alþingi þótti við hæfi og heimilaði fyrir skömmu.  Sá bónus eykur líka á verðbólguna í landinu því að banksterinn fær ekki sinn bónus nema að selja eitthvað af „vörum“ bankans á hærra verði en „varan“ var skráð í bókhaldi bankans. Að lögleiða þann bónus má líta á sem ákvörðum alþingis og ríkisstjórnar um að auka verðbólgu í landinu.

Af framansögðu leyfist að spyrja: Hvers vegna samþykkti ríkisstjórnarmeirihlutinn að auka verðbólgu í landinu og veita verðlaun fyrir það? Var það fyrir einhvern sérstakan? Ef það er eða var ekki ætlunin að auka verðbólguna hvers vegna heimilar meirihluti þingmanna þá ríkisbönkunum að gefa þeim bónus sem tekst að selja „vöru“ bankans á yfirverði, sem augljóslega hækkar verðlag og eykur verðbólgu?

Eða var þetta – og er – þetta með bankabónusana – eingöngu venjuleg íslensk stjórnsýsla; vanhugsuð stjórnarathöfn?

Og loks vaknar sú spurning hvort greiðsla á bónusum sem valda verðbólgu og skaðar land og lýð flokkist sem landráð.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,941