Velferðarvísitala

Ef þú lemur náunga þinn og brýtur úr honum kjaftinn stuðlar þú að hagsæld samkvæmt fræðunum; tannsmíðin og önnur læknishjálp sem náunginn þarf á að halda eykur efnahagslegan vöxt í landinu, hagtölur bólgna og framleiðni eykst.

Þeir sem búa um rúm ferðamanna á hótelum landsins fá 10% launahækkun og þaðan í frá 220 þúsund í mánaðarlaun. Þá á íslenskur aðall að fá sín 10% samkvæmt reiknikúnst lagatextans. Forsetinn fær því 200 þúsund króna hækkun og eftir það 2,2 miljónir á mánuði. Meðaltalslaun forsetans og eins þjónustumanns á hóteli eru því rúmlega tólfhundruð þúsund krónur á mánuði. Meðallaun í landinu mun víst vera allt í kring um 500 þúsund á mánuði ef rétt er munað. Það merkir að fjöldinn allur er langt undir því og margir með verulega mikið meira.

Prósentureikningur, meðaltalsreikningur og hagvöxtur sem fundinn er út með þeim hætti sem gert er villir um fyrir fólki. Útkoman er alltaf skökk. Hún gefur ranga mynd af þjóðarheill. Það er löngu orðið tímabært að gagnmenntað hæfileikafólk leggi grunn að nýrri vísitölu, velferðarvísitölu sem gæti mælt hagsæld einstaklinga. Út frá stöðu hennar hverju sinni þyrfti að vera hægt að sjá hvort fólkið í landinu hafi undantekningarlaust nóg að bíta og brenna, hvort það fái læknisþjónustu á viðráðanlegu verði þegar það þarf á henni að halda, hvort það geti geti sótt sér þá menntun sem það óskar eftir og hæfileikar þess segja til um og annað það sem gerir lífið þess virði að lifa því.