Úlfar Þormóðsson 05/12/2016

Valdarán

Á Íslandi eru 74 sveitarfélög. Samtök atvinnulífsins (SA) leggja til að þeim verði fækkað í níu. SA fullyrðir að sameining sé leið til að ná fram alvöru hagræðingu í rekstri þeirra.  Alvöru hagræðingu, segja þau; hagræðingu stærðarinnar. Kíkjum á hana.

28182v

Samtökin  leggja til landið frá Eyrarbakka að Höfn í Hornafirði verði eitt sveitarfélag. Spyrjum af tilefninu: Er það hagkvæmt fyrir Vestmannaeyinga, íbúa Hafnar í Hornafirði eða Þorlákshafnarbúa að hafa hreppskontórinn í Vík í Mýrdal eða Hellu?

„Við sjáum að stærri sveitarfélög eiga að skila aukinni stærðarhagkvæmni,“ segja spekingar SA. Þetta er nýyrði, stærðarhagkvæmni. Það felst eitthvert loforð í því, en brúkun á því í rökstuðningi spekinganna gerir það merkingarlaust þegar þeir segja: „Málefni fatlaðra voru færð yfir (frá ríki til sveitarfélaga) árið 2011 en málið er að þau (litlu sveitarfélögin) ráða bara ekki við það.“ Og þá má spyrja: Ráða stóru sveitarfélögin við það? Hlusta þessir menn ekki á tíðindi dagsins og hafa þeir gleymt mánaðalöngum fréttum frá því í sumar og haust af stórkostlegum vandræðum við flutning á fötluðum á milli staða á „Stór-Reykjavíkursvæðinu“ ?

Svo fullyrða þeir þetta, hinir hagfræðimenntuðu SA menn: „Tilfærsla grunnskólanna árið 1996 hafði mjög jákvæð áhrif ….“ Ætli það sé ekki hægt að leyfa sér að efast um að þeir hafi spurt fólkið í sveitarfélögunum að þessu; foreldra og nemendur fjársveltra skóla sameinaðra sveitarfélaga út um allt land, svo dæmi sé tekið.

Og svo má spyrja af tilefni „stærðarhagkvæmninnar“: Er hinn hýri Hafnarfjörður betur stæður efnahagslega en hin fámanna Hólmavík, Reykjanesbær öflugri en Reyðarfjörður, svona peningalega séð?

Landsmenn ættu að blása í alla brunalúðra landsins vegna þessa máls, vakna. Og gera sér ljóst að markmiðið með stækkun sveitarfélaganna er að færa meira vald til færri staða og á enn færri hendur en nokkru sinni. Þess vegna er ástæða til þess að taka undir með Gunnari I. Birgissyni, bæjarstjóra í Fjallabyggð þegar hann segir í Vísi.is (05.12.´16): „Í raun og veru fer valdið á einn stað langt frá flestum af þessum byggðarkjörnum … en það má ekki tapa þessari nánd við kjörna fulltrúa og embættismenn, sem óhjákvæmilega yrði. Þetta er bara miðstýring.“

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,770