Vá hvað ég er EKKI að fylgjast með. Líflegur framboðsfundur á facebook

Eitt sinn réðu framboðsfundir miklu um hvernig kjósendur vörðu atkvæði sínu. Þeim fer nú mjög fækkandi.

Í fjölmennasta sveitarfélaginu, Reykjavík, eru engir framboðsfundir, en rökræður og samræður stjórnmálamanna og kjósenda fara fram annars staðar – á vinnustöðum og kaffihúsum, en líka á facebook.

Herðubreið birtir hér nýleg (stytt og stundum samandregin) samskipti reykvískra kjósenda og stjórnmálamanna, þar sem rökrætt er um kosti og galla fram kominna lista.

Þar er sumt léttúðugt en annað alvarlegt, og stundum birtist höktandi samskiptamáti internetsins, en lesningin er fróðleg og vonandi gagnleg.

Rétt er að hafa í huga að hér tala saman fulltrúar þeirra 75 prósenta Reykvíkinga sem virðast ekki líta á hægri flokkana sem valkost, en velta fyrir sér kostum og göllum á hinum framboðunum.

Samtalið kviknar með hugleiðingum Auðar Jónsdóttur rithöfundar, en eiginmaður hennar er Þórarinn Leifsson myndlistarmaður:

„Við hjónin erum búin að tvístíga á milli Samfylkingar og Bjartrar framtíðar í sveitastjórnarkosningunum í Reykjavík, enda eru báðir þessir flokkar með margt gott og klárt fólk á sínum listum. Ég reyndar líka aðeins daðra við VG þar sem kempukerlan Agla Þorgerður er á lista. En eftir að hafa hugsað málið hvort í sínu horni og síðan borið saman bækur okkar komumst við að því að við stefnum bæði á að kjósa Samfylkinguna.

Aðalástæða mín er sú að ég er krónískur leigjandi og mér finnst Dagur hafa talað af röggsemi um ástandið á leigumarkaðnum. Kannski hafa hinir gert það líka, sennilega í einhverjum mæli, en ég bara rekist á ummæli Dags. Veit ekki en svona er maður tækifærissinnaður.

Ef einhver veit betur þigg ég gjarnan upplýsingar um stefnumál hinna flokkanna í þessum máli, sitjandi hér í Berlín þar sem allt fer framhjá mér nema tilviljanakenndar fréttir á netinu.

Kýs á morgun (og er kjósandi sem á til að skipta um skoðun inni í kjörklefanum …).

Thorarinn Leifsson: Er Björt Framtíð með einhverja stefnu fyrir utan „haltu kjafti og vertu sætur“? Best að tékka á þessu… Ég vil bara betri leikskóla og að leikskólakennarar séu á ofurlaunum. Væri sennilega að kjósa VG ef þau væru ekki búin að glutra niður fylginu.

Hákon Már Oddsson: Kratarnir (samfylkingin) og kommarnir (vinstri grænir) sem fela sig bak við græna slæðu leyfðu auðvaldinu að gera eignaupptöku á alþýðunni án þess að hreyfa litlafingur… björtu krakkarnir eru bara kaffilepjandi miðbæjarspútnikar og munu örugglega fjölga blómapottunum á laugaveginum… mitt móttó er að kjósa alltaf róttækasta framboðið…

Magnus Matthíasson: Er Dagur ekki með þetta? Mér finnst engin pólitísku tala um húsnæðis og leigumarkaðinn nema rétt sí svona, og ekki meir.

Thorarinn Leifsson: Þetta er spurningin. Sumsé hvort maður fer með atkvæðið strax í Dag eða bíður eftir Bjartri en óljósri Framtíð. Þetta var aulabrandari dagsins í boði Þórarins L Og nú er ég farinn!

Hallgerður Pétursdóttir: Kíktu á Kastljósið í gær, hún fór á kostum, Ingadóttir, man ekki í svipinn nafnið hennar en djö… sem hún er með þetta.

Thorarinn Leifsson: Hjá hvaða flokki? (Vá hvað ég er EKKI að fylgast með)

Þorgerður Agla Magnúsdóttir: Hæ! Þú minntist á mig! Skoðaðu nú aðeins VG betur mín kæra, þar er nú líka stefnan á að auka almennt framboð á leigu- og búseturéttaríbúðum um 2500 á kjörtímabilinum. Auk þess sem er lögð mikil áhersla á að útrýminga biðlista hjá þeim 550 sem teljast í brýnni þörf eftir félagslegu leiguhúsnæði. Tékkaðu á þessu og fleiru á nýju síðunni: http://gjaldfrelsi.is/

Silja Aðalsteinsdóttir: Með fullri virðingu þá er Dagur bestur.

Sigþrúður Gunnarsdóttir: Við viljum fá Dag sem borgarstjóra, þá er best að kjósa hann bara.

Audur Jonsdottir: Hæ Agla, já, ég reyndar á samleið með VG (og líka Samfylkingu) ef eitthvað er að marka kosningapróf DV. Ég er mjög glöð að sjá þetta hjá þér og ætla að skoða það betur. En ég óttast samt VG-fylgið, að góð vilyrði fari fyrir lítið út af fylgisleysi, sbr. síðustu kosningar (en svona á maður auðvitað ekki að hugsa:)

Heidi Strand: Ertu ànægð með nýja borgarskipulagið? Ekki ætla ég að kjósa flokka sem samþykktu það.

Thorarinn Leifsson: 23.8 C úti Auja. Eigum við ekki að drífa okkur? Grípum Daginn strax því þótt okkar framtíð sé Björt þá er hamingjan svo ósköp hverful og að minnsta eitt barnaafmæli á sjónarröndinni.

Audur Jonsdottir: Mér skilst reyndar, eftir að hafa borist greinargóður póstur, að hugmyndir um leigumarkaðinn séu samvinnuverkefni Samfylkingar og Besta flokks að miklu leyti. Svo rétt skal vera rétt. (Verst að geta ekki kosið þessa þrjá flokka með einu atkvæði, hvernig væri að sameina þá?).

Margrét Örnólfsdóttir: Auja mín, Samfylkingin stendur vel fyrir sínu með Dag okkar og marga aðra góða fulltrúa.

Maria Kristjansdottir: Dagur fær alveg nóg atkvæði, engin ástæða til að hafa áhyggjur af honum. Leigjendapólitík vg er betri og vilji þeirra til að fella niður leikskólagjöldin alveg. Og Björt framtíð með sína „Dýrin í Hálsaskógi“ stefnu kemur náttúrulega ekki til greina. En ég veit ekkert enn um Pírata í borginni. – Bara svona mitt yfirlit!!

Heidi Strand: En hvað með Dögun?

Sóley Tómasdóttir: Auður. Húsnæðisstefna borgarinnar var unnin í samstarfi allra flokka og Vinstri græn eiga aldeilis sinn þátt í henni. Það var fyrir okkar tilstuðlan að inn í hana var sett ákvæði um að 25% af öllum íbúðum á nýbyggingarsvæðum skyldi vera til leigu eða búseturéttar. Dagur hefur talað meira en við hin um þetta, en við eigum þetta öll saman.

Olof Embla Eyjolfsdottir: Varðandi VG og leikskólamálin – Tóti, ég er svo sammála þér varðandi launakjör leikskólakennara. Einmitt þess vegna er ég brjáluð út í VG (sem ég fylgi annars að máli í flestu) yfir þessu rugli um að gera leikskólann ókeypis í borginni. Þetta er ekki mikið sem fólk er að borga og langflestir ráða auðveldlega við það. Hins vegar myndi sami peningur geta hækkað laun leikskólakennara til muna. Forgangsröðunin þarna er út úr kú og ekkert nema popúlismi! Og hananú!

Magnús Teitsson: Popúlisminn í VG að vilja gera leikskóla gjaldfrjálsa er það sem heldur aftur af launum leikskólakennara. Einmitt.

Sóley Tómasdóttir: Áætlaður rekstrarafgangur borgarsjóðs á næstu fimm árum er á bilinu 2-5 milljarðar. Við gerum ráð fyrir að nýta 750 milljónir í gjaldfrelsið. Þá eru ennþá eftir fjármunir til að m.a. hækka laun kennara – og það hyggjumst við sannarlega gera. Það er merkilegt hvað fólk er fljótt að detta í afarkostapólitík þegar kemur að uppeldi og menntun – það er svigrúm til að gera meira en bara eitt Ólöf Embla.

Olof Embla Eyjolfsdottir: Það er ekki það sem ég sagði Magnús. Ef að hægt er að losa upphæð X til að bæta leikskólamál í borginni, þá væri það popúlismi að nota þá peninga til að gera leikskóla gjaldfrjálsa (af því að það höfðar til margra, þ.m.t. þeirra sem ekki hafa neina þörf fyrir það). Á sama tíma er raunveruleg þörf á því að hækka laun leikskólakennara, en slíkt loforð myndi vinna miklu færri atkvæði. Mér finnst þetta virkilega leim og ég er vonsvikin með þetta útspil. Kannski er ég bara svona naive að halda VG við hærri standard.

Sóley Tómasdóttir: Sástu ekki athugasemdina mína Ólöf Embla?

Olof Embla Eyjolfsdottir: (Nei, ekki fyrr en ég var búin að ýta á enter, ella hefði ég svarað henni í minni athugasemd.) En Sóley, ég hef ekki heyrt orð um slík áform. Vonandi er svigrúm til að gera sem flest, og mikil þörf að gera margt í leikskólamálum, en það er ekki hægt að setja allt í einn málaflokk og mér bara blöskrar þessi forgangsröðun hjá ykkur og hún olli mér vonbrigðum. Vissulega mætti setja í forgang að afnema leikskólagjöld fyrir þá hópa sem þurfa á því að halda (og rýmka þau skilyrði), en margir finna ekki fyrir þessu og þeim peningum væri mun betur varið í leikskólakennarana okkar.

Sóley Tómasdóttir: Við ætlum að gera bæði og það er svigrúm til að gera bæði. Svigrúmið til að tala um stefnumál okkar opinberlega er aftur á móti lítið og þess vegna hafa öll okkar stefnumál ekki komið fram í fjölmiðlum. En hér er klausa úr stefnunni okkar sem má finna á www.vg.is: Stöndum með hverfisskólunum í að efla og þróa fjölbreytta og innihaldsríka menntun. „Tryggjum fjármagn og mannafla til að ljúka innleiðingu nýrra aðalnámskráa í leik- og grunnskólum og fylgja eftir stefnu um skóla án aðgreiningar. Fötluð börn og foreldrar þeirra eiga að hafa val um skólaumhverfi sem hentar barninu best með viðeigandi ráðgjöf og stuðningi. Bætum kjör og starfsaðstöðu kennara sem skólastarf í borginni byggir á.“

Katrín Jakobsdóttir: Gjaldfrelsi var ein af undirstöðunum þegar almannaskólanum var komið á en hann hefur reynst ein af undirstöðum jafnaðar á öllum Norðurlöndum; jafnaðar og velferðar. Því miður hafa hægristjórnir annars staðar á Norðurlöndum reynt að grafa undan þeim grunni á síðustu árum en það breytir því ekki að þetta kerfi er enn miðlægt í norræna velferðarkerfinu. Á þessum grunni hvíla grunnskólarnir okkar og við setjum ekki kjör grunnskólakennara í samhengi við þá staðreynd að skólarnir eru gjaldfrjálsir. Leikskólarnir verða síðar hluti af almenna menntakerfinu en þeir eru fyrsta skólastigið og það er menntapólitísk spurning hvernig við lítum á leikskólana okkar og hvort við metum ekki mikilvægi þeirra hið sama og grunnskólanna. Svo hugsa ég bara sterkt til þín á morgun Audur Jonsdottir og sendi þér hugskeyti með öllum mínum krafti, ef Thorarinn Leifsson verður við hliðina á þér fær hann kannski smá andvara af skeytinu.

Audur Jonsdottir: Takk kærlega öll fyrir góðar upplýsingar, bæði hér og í einkapóstum. Ég lygni aftur augunum í kjörklefanum í sendiráðinu, fiska flögrandi vissu upp úr hugarfylgsnunum og fylli út í kosningaseðilinn með ósjálfráðri skrift.