Uppljóstrarinn

Alþingi samþykkti á sínum lokadegi að fella úr lögum ákvæði um uppreist æru. Um það segir fyrrverandi dóms- og kirkjumálaráðherra, Björn Bjarnason í pistli í dag 27.09.´17:

“… að umræðurnar um uppreist æru hafa leitt í ljós að uppnámið sem varð er í raun út af engu. Það var unnt að veita uppreist æru án þess að einhverjir einstaklingar sendu dómsmálaráðuneytinu bréf um þann sem sótti þennan rétt sinn. Bréfin voru einskonar varnagli af hálfu embættismanna og áttu uppruna sinn á tíma sem er löngu liðinn þegar ekki var unnt að slá upp nafni viðkomandi í tölvu og fá allar og nákvæmari upplýsingar um hann og hegðun hans en kunningjar eða samstarfsmenn hafa á takteinum.”

Þarna er tvennt upplýsandi um sjálfstæðismanninn Björn. Það fyrra er að hann lítur svo á að uppnámið sem varð, og varir enn, vegna barnaníðs, og tilburði níðinga til þess að fá hreina sakaskrá, hafi “í raun  (verið út) af engu”! Sem merkir að það hafi bara verið kjánaskapur, ef ekki fíflska, að fólki að fetta fingur út í tilburði níðinganna til þess að hljóta opinbera syndaaflausn.

Síðara atriðið bendir til þess að Björn hafi misst taum á tungu sinni. Aftur. Nema að hann sé orðinn uppljóstrari. Meðvitað. Það gæti orðið forvitnilegt. Fyrir nokkrum dögum sagði hann frá því að Bandaríkjamenn hafi flutt herinn frá Kaflavík vegna þess að þá stafaði engin hætta frá Rússum; þeir voru vinir Nató, jafnvel meira en það.  Og nú ljóstrar hann upp um starfsemi sem fram fer í dómsmálaráðuneytinu. Á laun. Þar er að finna allar upplýsingar um okkur, hann og hana. Þar er hægt “að slá upp nafni viðkomandi í tölvu og fá allar og nákvæmari upplýsingar um hann og hegðun hans en kunningjar eða samstarfsmenn hafa á takteinum.” Þetta er svakalegt, ef maðurinn er að segja satt.

Þó ekki væri vegna annars en þess að Björn er einn helsti hugmyndafræðingur Sjálfstæðisflokksins er sorglegt að hugsa til þess að honum skuli þykja harmur þeirra sem orðið hafa fyrir ofbeldi níðinga svo lítilsverður að það taki því ekki að huga að honum. Og það er ekki síður sorglegt að hann skuli benda flokksmönnum sínum á að kvalræði fólks skiptir engu máli.

Eitt er þó gott við þróunina sem er að verða á pukraranum Birni. Hann er að kikna undan launungarmálum sinnar pólitísku ævi. Guð láti gott á vita, hefði einhverntíma verið sagt af minna tilefni..