Uppdráttarsýki umræðunnar

Stjórnmálaflokkar íslenskra vinstrisinna og miðjumanna eiga ekki miklu fylgi að fagna þessa mánuðina ef mið er tekið af skoðanakönnunum. Þeir hjakka í svipuðu fara og þeir lentu í við síðustu kosningar þrátt fyrir að við völd sitji ríkisstjórnin sem nýtur aðeins fylgis þriðjungs kjósenda. Hins vegar streymir fylgið til Pírata sem hvorki hafa skilgreint sig til hægri né vinstri. Um síðustu mánaðamót mældust þeir með jafn mikið fylgi og báðir stjórnarflokkarnir samanlagt og meira fylgi en ríkisstjórnin.

Dagblöð, útvörp, sjónvörp og fjölmiðlar af allri gerð hafa eðlilega fjallað um þessa bágu stöðu vinstrisinna. Alvitringar skrifa lærðar greinar og fréttamenn keppast við að ræða við stjórnmálamenn og fræðinga um vinstrikreppuna og fáir þeirra, ef nokkrir, sjá til lands á bakborða.

Á sama tíma hefur það líka gerst að hægri flokkarnir missa tiltrú. Framsóknarflokkurinn er kominn úr 24,4% fylgi frá því í síðustu kosningum niður í 10- 12% nú. Sjálfstæðisflokkurinn fékk 26,7% atkvæða í kosningum 2013 en mældist í lok júlímánaðar með 23,1%. Í kosningum 1999 fékk hann 40,7% greiddra atkvæða og hefur því týnt nærri helming fylgis síns það sem af er öldinni. Eigi að síður tala fáir um vanda hægrimanna.

Og svo spyrjum við flónin: Af hverju snýst umræðan frekar um stjórnmálalegan vanda vinstri en hægri? Getur það ráðsit af eignarhaldi á fjölmiðlum? Hefur einver sérstakan hag af því að blása út vanda vistrisins, dreifa fréttum af honum og magna hann, en þegja um vanda hægrisins þó að hann sé síst minni?

Og ein spurning í viðbót: Af hverju fer lítil sem engin umræða fram um það hvaða villur sé að finna í stjórnkerfinu og þá hvar og hvaða þátt þær eigi í uppdráttarsýki stjórnmálaflokkanna?

Eftirskrift:

Nú berast fregnir af því að hönnunarkeppni að nýbyggingu Landsbankans í miðbæ Reykjavíkur hafi verið frestað til þess að fara yfir gagnrýni á byggingaráformin sem fram hefur komið síðust vikur. Þetta er ágætt svo lengi sem bankinn gefst ekki upp fyrir þröngsýni heimskunnar, hættir við að byggja og gefi lóðin eftir til hótelbraskara.