Úlfar Þormóðsson 07/02/2016

Undir dúknum

Átjánda janúar síðast liðinn lýsti Kristján Þór Júlíusson, heilbrigðisráðherra því yfir að hann vonaðist til að rætt yrði við fulltrúa hjúkrunarheimila um rekstrarvanda þeirra við fyrstu hentugleika. Mánuði síðar, 6. febrúar, var árangri viðræðna lýst í fréttum Sjónvarpsins.

Hálfviti

Þar var frá því greint að stjórn Hrafnistu hafi í hyggju að leigja öldruðum húsnæði beint, framhjá ríkinu, og fyrir hærra verð en dvalargestir þurfa nú að greiða. Hjúkrunarheimilið Ás í Hveragerði hefur breytt hluta af dvalarrýmum aldraðra í gistiheimili fyrir ferðamenn og ætlar að hefja útleigu í mars. Ráðherra gerir ekki athugasemd við það. Hjúkrunarheimilið Grund í Reykjavík ætlaði að gera slíkt hið sama, en umsókn heimilisins um að breyta rýmum í gistiheimili var hafnað af Reykjavíkurborg. Í staðinn stefnir Grund að því að leigja námsmönnum. Uppátæki heimilanna eru sprottin af því hve fjárhagur þeirra er bágur. Við þetta mun hjúkrunarrými í landinu fækka umtalsvert en nú munu tæplega 300 manns vera á biðlista eftir slíku plássi.

Í fréttunum í gærkveldi sagði hinn árvökuli heilbrigðisráðherra, að þessi tíðindi kæmu sér á óvart: „Ef þeir eru að taka hjúkrunarrými úr rekstri eru það mér alveg ný sannindi.“

Og áfram talaði hinn opinberi hagsmunagæslumaður öldunganna: „Ég dreg enga dul á það, að það má bæta og þarf að bæta fjármögnun þeirrar þjónustu sem þarna undur heyrir.“ Spurði þá fréttamaður hvort hjúkrunarheimilin mættu eiga von á einhverju útspili fljótlega. Því svaraði ráðherra sí svona:

„Ég vo… það, þarf tvo til. Ég ætla að vona að við náum einhvers konar lendingu öðru hvoru megin við mánaðamótin, já.“

Það þarf tvo til er merkilegt svar. Það er margrætt. En í því samhengi sem ráðherrann brúkaði það í gær er það einsog gegnsær dúkur sem kastað er yfir hroka hins getulausa.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,745