Úlfar Þormóðsson 12/07/2016

Tregfiski

Hann rær upp á hvern dag formaður Framsóknarflokksins. Á sín mið. „Hann ferðast um landið og talar við flokksmenn“, er haft eftir vonarstjörnu flokksins. Og varaformanninum líka. Og að sjálfsögðu þingmönnum flokksins sem gjarnan segja það sama og síðasti ræðumaður.

sigmundur-david

Formaðurinn fer byggð úr byggð og heldur fundi. Ekki almenna félagsfundi heldur fámenna fundi valinna gæðinga. Lokaða. Notar gjarnan postulatöluna. Og þá er hann þrettándi maður fundar. Það fréttist af slíkri samkomu á Húsavík. Hann stóð í þrjá tíma. Postulunum líkaði ekki það sem þeir heyrðu og það varð leki. Meðal þess sem komst í hámæli um fundarefnið var þetta, samantekið: Talið fyrir formanninum og gegn haustkosningum.

Það annað sem er að frétta úr kjördæmi formannsins er að almennir flokksmenn vilja hann ekki í framboð þótt einn og einn postuli styðji hann enn. Þar sem Höskuldur Þórhallsson, annar maður á lista í síðustu kosningum, á litlu meira fylgi að fagna en formaðurinn eru flokksmenn farnir að leita hófanna og hafa biðlað til bæjarfulltrúa flokksins á Akureyri sem mun hafa lítinn áhuga fyrir þingmennsku.

En formaðurinn er ekki alveg skini skroppinn. Hann áttar sig á veikri stöðu sinni í kjördæmi eyðibýlis síns. Og er farinn að undirbúa framboð í margmenni og hefur í hyggju að nema land í Reykjavík, þó að hann sé fluttur í Garðabæ. Og er farinn að vinna að því. Vigdís Hauksdóttir líka. Hún ætlar ekki í framboð næst. Hún er að rýma til. Svo vel má vera að formaðurinn sitji í efsta sæti í öðru Reykjavíkurkjördæminu og vonarstjarna flokksins í hinu. Hann með nýja sýn á lífið. Hún með hreinan skjöld eftir því sem þau bæði telja. Enn er þó óvissa varðandi það hvort hann verður sem formaður í framboði eða bara Sigmundur Davíð fyrrverandi hitt og þetta.

Af þessu er ljóst að hann hefur ekki aflað vel í sumar, formaður Framsóknarflokksins. Það er tregfiski.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,733