Margrét Tryggvadóttir 03/06/2015

Tilkynningar lögreglu í fjölmiðlum

Í gær var ótrúlega klikkaður fréttadagur og hálf þjóðin nánast óvinnufær af flissi. Tvær fréttir sem tengjast lögreglunni og aðilum mála finnast mér undarlegar og kannski líka furðulegt að þær hafi ekki fengið meiri athygli.

Fyrra atriðið sem ég hnaut um kom fram í viðtali við Malínu Brand sem hafði að eigin sögn verið „lent í“ að skutla systur sinni til að ná í fulla tösku af peningum frá forsætisráðherra. Í viðtali og frétt Aðalsteins Kjartanssonar á Vísi segir:

Óheppilegt orðalag
Í tilkynningu sem lögregla sendi til fjölmiðla fyrir hádegi sagði: „Við yfirheyrslur játuðu konurnar að hafa sent umrætt bréf og var þeim sleppt að yfirheyrslum loknum.“

Friðrik Smári Björgvinsson, yfirlögregluþjónn hjá lögreglunni á höfuðborgarsvæðinu, segir í samtali við Vísi að um óheppilegt orðalag sé að ræða.

„Þær komu kannski ekki báðar að því að póstleggja bréfið. En þær játuðu báðar aðild sína að málinu.“

Verðum við ekki að gera þá kröfu að lögreglan sé miklu nákvæmari í orðavali þegar hún sendir frá sér tilkynningar um sakamál?

Hitt atriðið var í frétt Vísis í dag um stóra umsátursmálið. Í gær kom í ljós að íbúðin sem sérsveitarmennirnir höfðu legið fyrir framan og beint vopnuð að var mannlaus. Seint í gærkvöldi hafði lögreglan komist að því að maðurinn sem á heima í íbúðinni hefur ekki verið þar í nokkurn tíma og alls ekki þegar hvellirnir heyrðust. Í fréttinni í dag segir:

Íbúum fjölbýlishússins við Hlíðarhjalla 53 hefur verið tilkynnt hvar eigandi íbúðarinnar sem setið var um í sex tíma í gær er niðurkominn. (Leturbreyting mín).

Bíðum nú við. Er ekki nóg að íbúarnir í fjölbýlishúsinu viti að maðurinn var sannarlega ekki í íbúðinni og sé alsaklaus af því að hafa skotið þar úr byssu um miðjan daginn í gær? Er það hlutverk lögreglunnar að upplýsa fólk um ferðir og viðveru nágranna þess? Kemur nágrönnunum eitthvað við hvar nákvæmlega þessi maður var?

c_documents_and_settings_llbmbh_my_documents_my_pictures_me_logum_skal_land_byggja

 

 

Flokkun : Efst á baugi, Pistlar
0,973