trusted online casino malaysia
Úlfar Þormóðsson 24/03/2015

Til umhugsunar

 

Það er gagnlegt að lesa grein sem Svavar Gestsson, fyrrverandi menntamálaráðherra mm. skrifaði á heimasíðu sína, Hugmynd, í gær, 23. marz. Hún er unnin  upp úr umsögn sem hann skrifaði fyrir Tímarit Máls og menningar um bók Styrmis Gunnarssonar, Í köldu stríði.

Svavar og Styrmir

Greinin varpar ljósi á þá áleitnu spurningar sem sífellt sækja að, hvers vegna lögin í landinu virðast fremur samin fyrir hina efstu stétt en almenning, hvers vegna stjórnkerfið er eins og það er og hvers vegna lýðræðið virðist vera í upplausn þessi misserin.

Í greininni er fjallað um ofurvald Sjálfstæðisflokksins. Svavar skrifar:

“Sjálfstæðisflokkurinn hefur verið stærsti flokkur landsins lengst af frá því að flokkastjórnmál urðu allsráðandi á Íslandi … Flokkurinn hefur verið aðili að ríkisstjórnum lengur og oftar en allir aðrir flokkar … hefur haft völdin í um það bil 54 ár af 70 árum lýðveldisins. Hann er flokkurinn; mikli-flokkur. Hann hefur ráðið ríkiskerfinu í meginatriðum öll þessi ár og þó hann hafi verið utan stjórna hefur það verið of stuttur tími til að breyta valdaaðstöðu hans nema að takmörkuðu leyti; langflestir æðstu embættismenn allra ríkisstofnana voru löngum skipaðir af honum. Jafnframt hefur hann haft flokkslegt pólitískt vald yfir stærsta blaði landsins Morgunblaðinu frá upphafi nútímastjórnmála á Íslandi. Hann hefur einnig haft veruleg áhrif á þá fjölmiðla sem fjölmiðlasamsteypan 365 hefur ráðið yfir. Og hann réði Ríkisútvarpinu að miklu leyti í áratugi bæði með útvarpsstjórum, útvarpsráði og menntamálaráðherrum og hann beitti því valdi miskunnarlaust. Þá hefur hann haft verulegt pólitískt vald í mikilvægustu stofnunum eins og lögreglunni, öllum bönkunum, Hæstarétti, Landsvirkjun, Seðlabankanum, Flugmálastjórn, flestum sýslumannsembættum landsins, utanríkisþjónustunni að miklu leyti með ráðherrum eða sterkum sendiherrum, eina síðdegisblaði landsins mjög lengi, Vísi. Líka helstu menningarstofnunum þó frá því séu nokkrar undantekningar eins og Kristján Eldjárn í Þjóðminjasafninu og Vigdís Finnbogadóttir í leikhúsinu eru skýr dæmi um. Þá hefur Sjálfstæðisflokkurinn ráðið yfir mikilvægustu hagsmunasamtökum landsins, það er samtökum atvinnurekenda, Vinnuveitendasambandi, Landssambandi íslenskra útvegsmanna, Kaupmannasamtökunum lengst af, Samtökum atvinnulífsins eins og þau heita núna. Stórfyrirtækin hafa yfirleitt verið undir forystu flokksmanna í Sjálfstæðisflokknum. Þá lagði hann sig fram um að stýra almennum samtökum eins og íþróttahreyfingunni; löngum voru leiðtogar hennar þekktir flokksmenn í Miklaflokki.“

Latest posts by Úlfar Þormóðsson (see all)
Flokkun : Efst á baugi
1,655