Úlfar Þormóðsson 29/05/2015

Til hamingju Ísland

For­sæt­is­ráðherra landsins sagði fyrir örfáum dögum að það kæmi til greina að hækka skatta ef samið yrði um verulegar launahækk­an­ir í kjaraviðræðum. Í dag, 29. maí, lofar hann skattalækkun. Af þessum orðum ber að draga þá ályktun að maðurinn viti ekki hvað hann segir þegar hann talar, skrökvi eftir hentugleikum eða líti svo á að ekki felist verulegar hækkanir í þeim kjarasamningum sem verið er að undirrita þegar þetta er skrifað.

Bjarni-Sigmundur

En ríkisstjórn ósannindanna hefur ekki í hyggju að gera samninga við opinbera starfsmenn alveg á næstunni. Hundruðum lækningaaðgerða og rannsókna hefur verið frestað eða aflýst sökum verkfalla. Og nú er svo komið geislafræðingar eru farnir að segja upp störfum vegna álags við að sinna bráðatillfellum.

Fréttablaðið skýrði frá því í dag að Sigrún Bjarnadóttir, geislafræðingur á Landspítalanum Fossvogi, ein þeirra sem er að hætta, segi að um  algjört niðurbrot sé að ræða í stéttinni: „Við erum að brotna niður vegna hræðilegs vinnuálags. Við erum bara sprungin núna og í dag eru sjö geislafræðingar búnir að segja upp störfum.“

Landsspítali

Ríkisstjórn frjálshyggjunnar ætlar hvorki að semjavið geislafræðinga né hjúkrunarfræðinga alveg strax. Því ræður einkavæðingarstefna hennar. Með því að halda þófinu áfram brýtur hún niður starfsanda á sjúkrahúsum og gerir hjúkrunarfólki nánast ómögulegt að sinna þeirri heilbrigðisþjónustu sem nauðsynleg er. Þegar kerfið er komið í rúst er leikur einn að einkavæða það. Halda ráðherrarnir. Hugsa þeir.

Í fyrirfram fögnuði yfir velheppnaðri aðför að sjúkrahúsum og heilbrigðiskerfinu hefur ríkisstjórn ósannindanna lagt fram frumvarp á alþingi um að heimilt verði að auglýsa töfralyf og töflur í sjónvarpi. Þá geta framleiðendur hvatt okkur til lyfjaneyslu við hverjum þeim kvilla sem á dynja fer og gert okkur að dópistum sem einkavædda læknaþjónustan mun fá að glíma við. Gegn gjaldi. Úr ríkissjóði.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
0,733