Þrenning  sönn og ein

Þjóðhöfðingjar okkar fengu kauphækkun í vikunni sem er að líða. Hún nam því sem næst lágmarks mánaðarlaunum, ellilaunþega, herbergisþerna og fiskverkafólks. Þeir eru glaðir, höfðingjarnir, og tala frá sér fögnuðinn hver um annan.

Forsetinn, verndari „þjóðkirkjunnar“, fór í útvarpið og talaði við okkur um voðaverkin í París á Rás 2. Hann ól á óttanum og hræddi hlustendur (Sjá nánar á Rúv.is.) áður en hann fór að velta því fyrir sér hvað hann ætti að gera við tvö hundruð þúsund kallinn sem hann fékk í launahækkun en sagði að vísu ekkert um það í útvarpið.

Biskup Íslands ræddi við við landsmenn í þættinum Grettistaki sem birtist í Hlaðvarpi Kjarnans í morgun. Hann (hún) taldi afleitt að læknar fái ekki laun í samræmi við menntun sína og starf. „Það er bara ekki nógu gott,“ segir (hann) hún. (Sjá nánar, Kjarninn.is) Svo fór hann/hún heim í leigulausa húsnæðið í Þingholtunum og kíkti aftur á launahækkunina sem hún/hann fékk umfram aðra.

Á sjöunda og áttunda áratug síðustu aldar kepptust framsóknarmenn við að eigna sér stórmenni utanlands og fullyrtu að þeir væru framsóknarmenn. Forsætisráðherra fékk næstum því eins margar krónur í hækkun og forsetinn. Í gleðinni yfir þessu leit hann til fortíðar fokksins þegar hann sagði á miðstjórnarfundi Framsóknarflokksins í morgun að John F. Kennedy, fyrrum forseti Bandaríkjanna, hafi verið framsóknarmaður. (Sjá námar, Kjarninn. is).

Sjálfsagt eiga allir misgóða daga. En ætli það sé ekki fremur sjaldgæft að þrír helstu höfðingjar þjóðar tali eins og álfar út úr hól á einum og sama deginum vegna prósentuhækkunar launa sinna.