Þrælslund

Utanríkisráðherra lýðveldisins Íslands er handviss um að efnavopnum hafi verið beitt í hinu ógeðslega stríði í Sýrlandi. Og hann veit hver gerði það. Hann er jafn viss um að Rússar hafi eitrað fyrir öldnum fyrrverandi njósnara í Bretlandi. Hann veit þetta. Og er þungorður í garð óþokkanna. Hann segir okkur, þegnum landsins, hins vegar ekki hvaðan hann hefur vitneskju sína og fullvissu. Flestir vita þó að hann veit þetta ekki, maðurinn, hann lepur þetta upp eftir stólpakjöftum stríðsþjóðanna; hinum fullyrðingaglöðu forystumönnum þeirra.

Utanríkisráðherra lýðveldisins segist skilja loftárásir Bandaríkjamanna, Breta og Frakka á efnaverksmiðjur í Sýrlandi. Hann segist hvorki hafa samþykkt þær né mótmælt þeim fyrir Íslands hönd. En hann skilur þær.

Sendiherra íslenska lýðveldisins í Rússlandi sagði á kvöldfréttum Sjónvarpsins nú, 14.04. 2018, að Ísland hefði samþykkt árásirnar á Nató fundi. Og þá án heimildar frá utanríkisráðherra? Án heimildar frá ríkisstjórninni? Því varla skrökvar hann, utanríkisráðherra lýðveldisins. Og naumast sendiherrann, maður sem vinnur við að bera gott á milli þjóða.
Nema það sé rétt sem blasir  – virðist blasa við hverjum þeim sem vill sjá: Ísland er ekki sjálfstætt ríki. Það er leppríki Nató.