trusted online casino malaysia
Úlfar Þormóðsson 20/01/2016

Þjóðþrifamál

Í gær var borin fram samsæriskenning. Flúnkuný. Í dag jókst trúverðugleiki hennar þegar Morgunblaðið sá sér ekki annað fært en að skrifa leiðara um húsnæðismál, þar sem stóð meðal annars: Óleystur er hins vegar sá húsnæðisvandi, sem leiðir til þess að hópur fólks hefur ekki efni á öðru en að búa í ólöglegu og óboðlegu húsnæði. Þetta á greinilega að brýna sjálfstæðismenn til þess að styðja húsnæðisfrumvörp félagsmálaráðherra, en hvíslað hefur verið að þau sitji þversum í koki þingmanna Vinnuveitendasambandsins.

EmojiSamsæriskenningin gengur út á það, að framsóknarmenn ætli að standa að ákvæði í stjórnarskrá um þjóðareign á auðlindum gegn þingmönnum sjárvarútvegsfyrirtækjanna og LÍÚ sálaða. Þeir ætli að keyra húsnæðismálafrumvörp félagsmálaráðherra í gegn um þingið í andstöðu við þingmenn byggingarfyrirtækjanna. Loks ætla þeir að standa gegn sölu á hlut ríkisins í Landsbankanum gegn þingmönnum Samtaka atvinnulífsins. Þessi afstaða er talin til vinsælda fallin meðal almennings og verður prufukeyrð nú svo víst sé hvernig reynist ef og ef og ef og þegar, framsóknarforinginn lætur verða af því að slíta stjórninni og boða til kosninga með lágmarksfyrirvara. Auk þess hefur foringinn, af sama tilefni, ráðið sér viðbótaraðstoðarmann sem á að setja fram hugmyndir að stórbættu vegakerfi í landinu, Framsóknarflokknum til framdráttar í landsbyggðarkjördæmum.

Samsæriskenningarsmiðurinn bendir á framsóknarforinginn hefur leikið nokkra einleiki upp á síðkastið sem taldir eru styrkja markaðstöðu hans, ef svo má segja. Smiðurinn bendir á að Framsóknarflokkurinn hafi verið andvígur þjóðaratkvæðagreiðslu og nefnir til andstöðu flokksins við atkvæðagreiðslu um framhald viðræðna um ESB-aðild og um stjórnarskrána. Þetta hefur mælst illa fyrir hjá kjósendum. En nú bregður foringinn á leik og býður þjóðaratkvæðagreiðslu, ráðgefandi vel að merkja, um verðtryggingu fasteignalána. Með því telur hann sig sýna frjálslyndi, en í reynd er hann að losa sig undan kosningaloforði um afnám verðtryggingarinnar, sem hann hefur ekkert komist áfram með, og það er klókt.

„Og ekki gleyma því,“ sagði smiðurinn, „að framsóknarforinginn hefur verið sæmdur nafnbótinni mesti kvenréttindakarlamaður í heimi. Hann er nýkominn af loftlagsráðstefnu í París og sögur herma að þar hafi hann lagt eitthvað til mála. Og síðast í gær, kyssti hann útlendinga, flóttamenn, og bauð þá velkona til landsins. Af þessum sökum geta flokksmenn haldið því fram að framsókn sé jafnréttisflokkur og náttúruverndarflokkur sem vilji hugga flóttamenn í neyð. Að öllu þessu samanlögðu getur foringinn haldið með flokkinn í kosningar hvenær sem er og mun fiska vel, einkum ef hann rýfur stjórnarsamstarfið á þeim forsendum að Sjálfstæðisflokkurinn hafi lagst gegn þessum „þjóðþrifamálum“; orð sem framsóknarmönnum er tamt að nota í kosningum.“

Latest posts by Úlfar Þormóðsson (see all)
Flokkun : Efst á baugi
1,336