Þjóðhátíðarsnoppungur

„Við stöndum hér á Austurvelli undir vökulu augliti þeirra Ingibjargar H. Bjarnason og Jóns Sigurðssonar,“ sagði forsætisráðherra, Sigurður Ingi Jóhannsson úr ræðupúlti á Austurvelli og vísaði til standmynda með stjörf augu steypt í eir. Ræða hans var hvorki skáldleg né skörugleg. En hún var frumframsóknarleg ef svo má að orði komast; þunglamaleg eins og þreyttur kúabóndi og nokkuð ærleg. Sigurður gæti áreiðanlega leitt Framsóknarflokkinn upp úr mykjunni sem hann veltist nú um í. Ef hann fær tækifæri til þess. Og kannski er hann  að hasla sér völl því að þetta sagði hann líka „undir vökulu augliti“ standmyndanna:  „Við erum kannski ekki „best í heimi“ eins og stundum er sagt, en við erum sannarlega góð.“ Þetta er kinnhestur, silkimjúkur snoppungur framan í formann Framsóknarflokksins, sem varla opnar svo munninn að hann greini ekki frá ímynduðu heimsmeti sínu eða þjóðarinnar.

…

Það vaknar í mér tregi í hvert sinn sem ég geng fram hjá og eða inn í bókabúð Máls og menningar við Laugaveg. Hann stafar af örlögum búðar og forlags með sama nafni; hvernig gæludýr menningarinnar spiluðu öllu úr höndum sér svo að hið forna höfuðból tvístraðist út um holt og móa. Í dag bauð búðin landsmönnum „Gleðilegan þjóðhátíðardag“ í Fréttablaðinu. Það ber að þakka það. Eigi að síður eykur heillaóskin á tregann; þessa dagana er búðin á leið frá einum braskara til annars. Nýi braskarinn er gjaldþrota framsóknarmaður upp á hundruðir miljóna. Hann hefur verið spurður hvaðan honum kemur fé til kaupanna. En hann svarar ekki. Samt á hann að minnsta kosti fimm fréttablöð til þess að birta svar sitt í og mætir vikulega í sjónvarp til þess að yfirheyra fólk í beinni útsendingu; auglýsir að hann geri það ærlega!

Það er því ærið verk sem Sigurður Ingi á fyrir höndum ætli hann að ná flokknum upp úr flórnum. Þar eru ekki bara fyrir honum „best í heimi“ mennirnir heldur líka Tortólafólkið, peningaþvottamenn og mannkynsbraskarar af margri gerð sem fylgjast „vökulum augum“ með honum. Það eru menn sem kunna að koma sorabrögðum á þá sem standa í vegi fyrir þeim.