Þingmóri

Við lok síðasta mánaðar birti undirritaður stuttan pistil, Stríðsfrétt, um vefinn Veggurinn.is. og þótt í djúpristu góðsemiskast að kalla mætti vefinn undarlegan. Í pistlinum kom fram að það eru stuðningsmenn Sigmundar Davíðs, formanns Framsóknarflokksins sem halda honum úti. Aðdáendur formannsins, aflögufærir á fé.

Það sem af er þessum mánuði hefur undirritaður endrum og eins fylgst með því sem skrifað er á vegginn. Hann er ekki bara undarlegur lengur, hann er auk þess orðinn að lygavef. Og það merkilega, eða hið ómerkilega, í því sambandi er, að langmestu er logið um Vinstri græna og Steingrím J. Sigfússon mótframbjóðanda Sigmundar formanns í Norðaustur-kjördæmi. Leiðréttingar á ósannindunum eru ekki birtar á vefnum en heilaspunanum haldið áfram og aukið í.

Skrifin á Veggnum hafa komið illa við Framsóknarmenn af ærlegu tegundinni. Þeim þykir þau rætin. Og það er ekki einasta vegna innihalds greina eftir þá bb og mumma, sem skrifa mest um SJS og Vg. Annað vegur þyngra og veldur þeim hryggð, þeim ærlegu. Þegar þeir rýna í ósannindatextann þykir þeim höfundareinkennin augljós. Þeir þekkja heilaspunann. Hafa heyrt hann áður. Úr munni formannsins. Og séð hann í greinum hans í Mogganum og á netinu um allt óréttlæti heimsins sem hellist yfir formanninn, óverðugan. Sé þetta rétt er Sigmundur Davíð ghostwriter fyrir þá bb og mumma. Nema hann sé sjálfur Guðjón bak við tjöldin; sé bb og mummi.

Pistlahöfundi tókst ekki að finna íslenska orðið yfir ghostwriter í orðabókum. Hann leyfir sér því að nota orðið móri um fyrirbærið þar til annað betra verður smíðað. Þar með gæti alþingmaður og ghostwriter, sem mætir ekki í vinnuna þar sem andi hans svífur þó yfir vötnum, verið réttnefndur þingmóri.