Þetta er draumi betra
Við erum enn á ný orðin sætasta stelpan á ballinu. Við, íslenska þjóðin, erum komin aftur á heimsdansleik bankamanna. Flottustu strákarnir eru þegar búnir að skrifa sig á danskortið hjá okkur; glæstustu útlendingarnir: Goldman Sachs, fjárfestingabanki, Och-Ziff Capital Management, fjárfestingasjóður og mútumeistari Afríku og líka Taconic Capital, vogunarsjóður svo nokkrir þeir stásslegustu séu nefndir til sögu. Og svo áfjáðir eru þeir í að breika með okkur að þeir keyptu sér allir 9,99% aðgang að danskortinu okkar svo dyraverðirnir mættu ekki leita á þeim þegar þeir ganga í salinn eins og þeim hinum sem kaupa yfir 10% aðgang.
Og einhverjir strákanna ætla að vera lengur hjá okkur en bara kveldið og nóttina sem það tekur að koma okkur til; „Við erum að horfa á þessi kaup sem fjárfestingu til meðallangs eða langs tíma,“ segir Frank Brosens, stofnandi og eigandi bandaríska vogunarsjóðsins Taconic Capital. Vá! Svona tala bara alvöru menn; strákarnir okkar.
Við erum sannarlega á réttri leið. Efnahagslega. Heimurinn horfir á okkur, dáist að fjármálasnilli okkar, klappar fyrir henni og brosir til okkar langt út í báðar kinnar. Og nú vill hann fá að dansa. Við okkur. Heimurinn. Og jafnvel kela og kyssa og kannski líka gera hitt undir leiði. Hver veit?
Og eitt er víst: Við eigum þetta skilið. Þetta er dásemd. Þetta er draumi betra.
- Sálumessa - 02/07/2020
- Umhverfisvændi - 21/04/2020
- Er brennivínið besti kostur? - 26/03/2020