Þensla, nei

Til leigu er fjögurra herbergja íbúð við Lindargötu; verð 380 þúsund krónur á mánuði (fyrirframgreiðsla aðeins eitt ár). Þetta er ekki merki um þenslu.

Áformað er um að selja erlendis hlutabréf í Arion-banka; ekki ber að líta á það sem merki útrásar og þenslu.

Reiknað er með að ferðamenn verði 1 miljón og 700 þúsund í ár; það er aukning um tæp 39% frá síðasta ár og alls ekki merki um þenslu.

Erlendu verkafólki fjölgar vegna þess að Íslendingar eru ekki nógu margir til þess að fylla í störfin sem vinna þarf í landinu. Það er ekki merki um þenslu.

Verð á gistingu í Reykjavík hefur hækkað um um tæp 40% á síðustu þremur árum og herbergjanýting hótelanna var um og yfir 90% á árinu. Það er ekki merki um þenslu.

Íbúðaverð hækkar um allt að 10% á ári og er alls ekki merki um að það sé þensla á markaðinum.

Það er gott að búa í fortíðarlausu draumalandi veruleikafirrtra atvinnuspámanna. Þar er engin bóla. Engin þensla. Og þess vegna hvorki hætta á kreppu né hruni. Þar er ævarandi framsókn. Eða Framsókn.