Ritstjóri Herðubreiðar 25/05/2016

Þegar Ríkisútvarpið bannaði sjálfu sér að flytja fréttir. – Einstök bók um einstæðar forsetakosningar

Eins og lesendur Herðubreiðar vita er væntanleg bók Karls Th. Birgissonar um forsetakjörið 2012: Alltaf einn á vaktinni – saga af forseta og þjóð hans.ruv

Herðubreið hefur áður birt stutt kaflabrot úr bókinni (sjá hér) og birtir nú annað með leyfi útgefanda. Þar er lýst einu dæmi um afleiðingar þeirra reglna um „hlutleysi“ sem Ríkisútvarpið setti sér í umfjöllun um kosningarnar.

„Það vantaði ekki fréttaefnin í ræðu Þóru, þegar hún opnaði kosningamiðstöðina í Heilsuverndarstöðinni 28. maí:.

Forsetinn rekur eigin stjórnmálastefnu í samkeppni við þingið. Eina óvissan í stjórnskipaninni er forsetinn sjálfur og túlkun hans á stjórnarskránni. Kristján og Vigdís voru ekki puntudúkkur. Forsetinn er lýðskrumari. Forsetinn á ekki að fleipra um land og þjóð.

Og svo framvegis.

Það vantaði heldur ekkert upp á að fjölmiðlar flyttu fréttir af þessari ræðu vel og skilmerkilega. Allir nema einn. Ríkisútvarpið.

Hálfum mánuði fyrr hafði ekki verið laus tökumaður til að senda á opnun kosningamiðstöðvar Ólafs Ragnars og því voru ekki sagðar fréttir af henni. Í samræmi við þá stefnu, að jafnmikið eða jafnlítið skyldi segja af öllum, birtist ekki stafkrókur í Ríkisútvarpinu um þessa ræðu Þóru.

Fyrir því má færa rök, að opnun kosningamiðstöðvar ein og sér sé ekki fréttnæm, en ræðan var það sannarlega og þögn Ríkisútvarpsins þeim mun vandræðalegri. Innan stofnunarinnar var fagfólk vægast sagt rasandi.

Á facebook undraðist Eiríkur Hjálmarsson þessi vinnubrögð og leitaði skýringa á því að ekki væri sagt frá opnuninni og ræðunni. Vaktstjóri á fréttastofu Ríkisútvarpsins þennan dag, Björn Malmquist, svaraði með mjög lýsandi hætti:

„Hvaða opnun? ;)““

(Úr 24. kafla, Puntudúkkan ræskir sig)

Fjármögnun útgáfunnar fer fram í samvinnu við Karolina Fund, svo sem lesa má um hér.

0,811