Úlfar Þormóðsson 14/12/2016

Það er von

Hann er kominn aftur. Risinn upp. Hann Sigmundur. Tekinn til við að huga um nýliðna tíð og farinn að átta sig. Sér það og segir, að það hafi verið dómadagsvitleysa að ganga til kosninga í haust eins og gert var þrátt fyrir varnaðarorð frá honum. En það mátti ein­hverra hluta vegna ekki nefna neitt annað, „það var ekki vel séð. Sum­ir kannski sáu í þessu tæki­færi fyr­ir sjálfa sig en aðrir voru held ég hrædd­ir við að styggja ein­hverja æs­inga­menn,“ sagði hann í útvarpsþættinum Reykjavík síðdegis nú í dag, 14.12.´16. En lengra er hann ekki komin í bakþankanum. Hann er ekki búinn að sjá af hverju hann hrökklaðist frá völdum í stjórnarráðinu og af hverju hann tapaði formannskjörinu í flokknum. Ekki enn.

sigmundur davíð

Þó ekki megi búast við of miklum bata í einu stökki er þó engin ástæða til þess að örvænta með framhaldið. Í sama viðtali og áður var nefnt má greina batamerki í hugsun mannsins. Lesið þetta eftir honum, orðrétt upp úr mbl.is sem segist hafa það úr útvarpsviðtalinu:

„Spurður að því hvor hann væri kom­inn til að vera á hinum póli­tíska sviði, svaraði Sig­mund­ur því til að hann hefði áður sagt að hann hygðist taka þátt í póli­tík á meðan hann teldi sig geta gert gagn og á meðan þar biðu stór, ókláruð mál. „Og núna stönd­um við frammi fyr­ir al­veg gríðarlega stór­um og mik­il­væg­um ókláruðum mál­um,“ sagið hann. „Næsta rík­is­stjórn mun þurfa að tak­ast á við end­ur­skipu­lagn­ingu fjár­mála­kerf­is­ins og einka­væðingu eða sölu á gríðarlega mikl­um eign­um. Og þeim eign­um fylgja gíf­ur­leg völd.“ Sig­mund­ur sagði bæði um að ræða bank­ana og stór eigna­söfn, og marg­ir vildu „koma þar að.“ Hann sagði ráðamenn þurfa að stand­ast „gíf­ur­leg­an þrýst­ing“ og láta ekki stjórn­ast af „ein­hverj­um flokks­heil­ind­um.““

Sigmundur Davíð. Það er maðurinn. Hann ætlar að vera á vaktinni. Standa gegn gíf­ur­leg­um þrýst­ingi þeirra sem vilja komast yfir sameiginlegar eigur okkar, standa gegn „ein­hverj­um flokks­heil­ind­um“ svo að eigur okkar verði ekki vinavæddar. Þetta ætlar hann Sigmundur að gera fyrir okkur. Okkur „hin“. Það er von.

 

 

 

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
1,029