Talsmaður fáfræðinnar
Það er sorglegt að sjá ungan mann forheimskast eftir því sem hann lifir lengur. Og grátlegt að sjá hann auglýsa fáfræði sína.
Ásmundur Einar Daðason (ÁED), þingmaður Framsóknarflokksins og aðstoðarmaður forsætisráðherra skrifar um Landsbanka Íslands á heimasíðu sína. Hann vill að bankinn „hafa forystu í því að nýta ljósleiðaravæðingu landsins í stað þess að þjappa öllu á eina dýra lóð í 101 Reykjavík“ og að bankinn selji lóðina „hæstbjóðanda.“
Nú hef ég enga vissu fyrir því að Landsbankinn noti ljóðsleiðara en af góðri reynslu af viðskiptum við bankann er ég ekki í minnsta vafa um að hann geri það líkt og flest öll fyrirtæki landsins. Hvatning þingmannsins um að Landsbankanum beri að „hafa forystu“ um eitthvað sem orðið er segir sögu af fullyrðingaþörf fáfræðinnar.
Í umræðu síðustu daga hefur komið fram að bankinn sparar sér hundruðir miljóna við að byggja einmitt þar sem hann á lóð, auk þess sem hann telur sig geta sparað 700 miljónir í rekstrarkostnað árlega. ÁED vill láta bankann selja lóðina „hæstbjóðanda.“ En hann veltir því ekki fyrir sér hver yrði hæstbjóðandi í hana, lóð sem er í miðbæ, hjarta höfuðborgar; eftirsóttasta byggingalóð landsins þessa stundina.
Án röksemdarfærslu leggur Ásmundur til að starfsemi Landsbankans verði endurskipulögð með það fyrir augum að nýta húsnæðiskost bankans um alla land. „Ég er sannfærður um að ítarleg skoðun á þessari blönduðu leið myndi sýna fram á hagkvæmni samanborið við að byggja risastórar höfuðstöðvar á dýrustu lóð landsins,“ skrifar hann.
ÁED fer fram á „almenna upplýsta umræðu um það í samfélaginu hvers vegna Landsbankinn ákvað að byggja höfuðstöðvar á Hörpureitnum í stað þess að veita viðskiptavinum sínum hagstæðari kjör. Með þessum orðum fullyrðir þingmaðurinn að stjórn bankans hafi á einhverri stundu staðið frammi fyrir þeim tveim kostum sem hann tilgreinir og valið annan. Segir þetta blákalt, framsóknarmaðurinn, og vill að hann sé tekin trúanlegur.
Sem betur fer er höfundur þessa pistils ekki sá eini sem sér í gegn um þunnildið. Maður er nefndur Sigurður Kristinn Pálsson. Ég þekki hvorki haus né sporð á honum, en hann skrifar athugasemd á heimasíðu ÁED og segir svo:
„Dæmalaust ruglaður pistill hjá enn einum stjórnmálamanninum sem reynir að stökkva á vinsældarvagninn í umræðunni, landsbyggðarþingmaður sem telur að allt sé vont sem gerist í höfuðborginni. Nokkur atriði til upplýsingar fyrir þingmanninn.
Búið er að vinna að endurskipulagningu bankans, líka hvað varað húsnæði og útibú.
Bankinn er ekki að þjappa öllu saman í 101. Rekur um 27 útibú á landsbyggðinni.
Orlofsíbúð á Ísafirði eru í boði fyrir ALLT starfsfólk, líka þá sem búa úti á landi.“
- Sálumessa - 02/07/2020
- Umhverfisvændi - 21/04/2020
- Er brennivínið besti kostur? - 26/03/2020