Sýndarveruleiki
Komið hefur í ljós að Ólafur Ólafsson, brellumeistari þjóðarinnar, tók um það bil 50 miljón dollara í umboðslaun af sjálfum sér fyrir að koma sér í þá stöðu að geta keypt Búnaðarbankann. Þetta er snilldarbragð. Og hann hefur tjáð sig um brelluna, Ólafur með ökklabandið, og fullyrt að enginn hafi beðið tjón af viðskiptunum, hvorki ríkisjóður né landsmenn. Einkaframtakið blífur.
Heiðursmennirnir, útlendu viðskiptajöfrarnir sem í vikunni er leið voru að kaupa Arion-banka af sjálfum sér seldu sér hann með afslætti; greiddu 0,79 dollara virði fyrir hlut sem átti að kosta 1,00 dollar og spöruðu nokkra miljarða fyrir sjálfa sig á sjálfum sér. Auk þessa fengu þeir rúmlega 20% afslátt hjá íslenska ríkinu af krónunum sem þeir höfðu komið undan í Hruninu og borguðu Arion með og spöruðu sér allmarga miljarða til viðbótar. Þetta er líka snilldarbragð, reyndar svo mikið að forsætisráðherra landsins fagnar kaupunum vel og fallega og býður jöfrana hjartanlega velkomna til landsins.
Og téður ráðherra. Sá fer hreint á kostum á þessum dýrðardögum einkaframtaks og gleðilegs hagnaðar. Í vikunni talaði hann á aðalfundi Samtaka atvinnulífsins og sagði þá, samkvæmt mbl.is þann 29.03.´17: „Bjarni Benediktsson forsætisráðherra segir einkaframtakið mæta allt of neikvæðu viðhorfi í dag. Á sama tíma hefðum við fjölmörg dæmi þess að einkaaðilar gætu unnið góð verk og nefndi hann Ísaksskóla í því samhengi.“
Sannarlega eru þetta snjallyrði hjá ráðherranum. Og sannmæli í nútímanum, því innihald orða hans er þetta: Hættum fortíðarvoli og rannsóknum á hundgömlum viðskiptum. Verum ekki svona neikvæð í garð einkaframtaksins. Við höfum „fjölmörg dæmi þess að einkaaðilar gætu unnið góð verk.“ Gleymum ekki „Ísaksskóla í því samhengi.“ Verum jákvæð, njótum stundarinnar, fögnum mætti einkaframtaksins í sýndarveruleikanum.
- Sálumessa - 02/07/2020
- Umhverfisvændi - 21/04/2020
- Er brennivínið besti kostur? - 26/03/2020