Ritstjóri Herðubreiðar 18/12/2014

Sýlindermaðurinn

Elísabet K. JökulsdóttirEftir Elísabetu Kristínu Jökulsdóttur

Kvöldið áðuren hann flytur inn

trúir hann mér fyrir því

að konur hafi oft skipt um sýlinder

til að varna honum inngöngu

og augu hans fyllast af tárum

og ég veit ekki hvort ég á að hlæja eða gráta

hann hafi dottið í það og þær haldið

að hann ætlaði að berja þær

og skipt um sýlinder með köldu blóði

hann komið að lokuðum dyrum

og tekur af mér loforð

að skipta aldrei um sýlinder, aldrei

ef allt hefði verið með felldu

hefði ég átt að rjúka heim og skipta um sýlinder

en ég ætlaði að fá mína sambúð

hvað sem það kostaði

þótt ég yrði læst úti eða inni

bara einhverstaðar.

Elísabet Kristín Jökulsdóttir (Enginn dans við Ufsaklett, 2014)

Flokkun : Ljóðið
0,909