Úlfar Þormóðsson 11/04/2015

Stórtíðindi eða stólpalygi

 

Netmiðillinn Kjarninn er beinskeyttur eftir því sem hægt er að vera í feluleik klíkusamfélagsins. Það er því full ástæða til þess að ætla að tilvitnanir, sem hann birtir í ræðu sem forsætisráðherra flutti við upphaf 33. flokksþings Framsóknarflokksins, séu réttar. Þær eru og samhljóða því sem aðrir fjölmiðlar hafa matreitt úr ræðu hans.

Í dag, 11. apríl 2015, má þar lesa þetta sem skrifað er degi fyrr, og vitnað í ræðuna þar sem herrann er að tala um vogunarsjóði:

sigmundur-david

„Umsvifin eru nánast óhugnanleg og ómögulegt er að segja til um hversu langt þau ná, en nýlegar fréttir herma að kröfuhafar hafi keypt hagsmunagæslu hér á landi fyrir 18 milljarða króna á undanförnum árum. Við vitum að fulltrúar kröfuhafanna hafa tekið saman persónulegar upplýsingar um stjórnmálamenn, blaðamenn og aðra sem hafa tjáð sig um þessi mál eða teljast líklegir til að geta haft áhrif á gang mála. Og í sumum tilvikum hafa verið gerðar sálgreiningar á fólki til að átta sig á því hvernig best sé að eiga við það.“

Þá fullyrti forsætisráðherra í ræðu sinni að reglulega séu skrifaðar svokallaðar leyniskýrslur hérlendis fyrir kröfuhafana þar sem „ … veittar eru upplýsingar um gang mála á Íslandi, í stjórnmálunum, opinberri umræðu, fjármálakerfinu og svo framvegis.“

Þetta eru svakaleg tíðindi. Uppljóstrun. Og hvaðeina með ólíkindum. En þar sem það er enginn smákalli sem flytur þau má ætla, svona fyrirfram að minnsta kosti, að þetta sé ekki fleipur eitt. Þess vegna eigum við sem heyrum, sjáum og lesum þetta rétt á því að fá svar frá ráðherranum við þessum grundvallarspurningum:

Hvar eru heimildirnar?

Úr því að ráðherrann gat lagt saman reikninga fyrir hagsmunagæslu kröfuhafanna upp á 18 miljarða hlýtur hann að hafa þá undir höndum? Hvar eru þeir? Hverjir fengu greiðslurnar og fyrir hvað, nákvæmlega?

Hvar er skýrslan um stjórnmálamenn, blaðamenn og aðra sem hafa tjáð sig um þessi mál eða teljast líklegir til að geta haft áhrif á gang mála? Hver vann hana?

Hverjir hafa verið sálgreindir og af hverjum?

Hverjir hafa skrifað „svokallaðar leyniskýrslur hérlendis fyrir kröfuhafana“? Hvað stendur í þeim og hvernig komst ráðherrann yfir þær úr því að þær voru leyndarmál?

 

Svörin við þessum spurningum skera úr um hvort ráðherrann er bara froðusnakkur eða maður staðreynda og stórra tíðinda. Það er því pólitískt lífsspursmál fyrir hann að birta svörin strax, eftir frummerkingu orðsins; nú þegar.

Ath.: Þetta er skrifað undir hádegisfréttaflutningi Ríkisútvarpsins, þar sem rétt í þessu var greint frá því, að ekki hafði náðst í fjármálaráðherra lýðveldisins til þess að bera tíðindin úr ræðu forsætisráðherrann undir hann.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
1,251