Söluvísindi

 

Af og til birtast fréttir, í nafni vísindanna, um heilnæmi þessa og hins. Þrautseigastir við birtingu vísindalegra heilsufrétta af vörum sínum eru vínframleiðendur. Þeir hafa aðgang að vísindamönnum sem ítrekað setja fram kenningar um að dagleg rauðvínsdrykkja sé virkileg heilsubót. Í glansviðtölum éta læknar þetta upp eftir þeim en skýra þó ekki endilega frá því sem reynslan sýnir að ekki er samasemmerki á milli vínneyslu og hestaheilsu. Sala á víni er jöfn og þétt um heiminn.

Í lok nóvembermánaðar birtu garðyrkjubændur í hvarfbaugunum þá frétt, í nafni vísindanna, að sítrónan væri allra meina bót og fátt betra til þess að halda heilsu en að háma í sig sítrónur. Hérlendis seldust sítrónur upp í hverri búðinni á fætur annarri. Svo kom bakslagið: Samkvæmt vísindarannsókn, sem birt var um miðjan febrúar, kom í ljós að sítrónur eru vondur kostur.

Nú hafa austurrískir svínabændur, í nafni vísindanna, kveðið upp úr með að beikonát lengi lífið. Það gerir B3 vítamínið í beikoninu, segja þeir. Tilraun á spóluormum, sem gefið var B3 vítamín, leiddi í ljós að þeir sem fengu það lifðu 10% lengur en aðrir þráðormar. Tafarlaust drógu svínabændurnir þá ályktun að maðurinn gæti lengt líf sitt um 10 ár með því að borða svo sem 100 grömm af beikoni á dag. Það eina sem skyggir á ljóma fullyrðingarinnar er, að það er eftir að gera tilraun af þessu tagi á mannskepnunni.

Enn er óvíst hversu rækilega þessi frétt muni auka beikonsölu hérlendis því að tilkynning um þessa vísindalegu niðurstöðu var fyrst birt í dag, 31. 03. En það skýrist innan tíðar. Hitt er ekki víst að upplýsist jafn skjótt, hvers vegna íslenskir fjölmiðlar – og reyndar fjölmargir erlendir líka – eru jafn ginnkeyptir fyrir söluvísindafréttum og dæmin sýna.