Úlfar Þormóðsson 26/02/2016

Snjallræði

Doktor Ragnar Árnason, prófessor er einn af fáum sem dirfast að hugsa eftir öðrum leiðum en vegum vanans. Hann hefur nú lagt fram athyglisverðar tillögur í húsnæðismálum.  Þær gætu vísast virkað vel hérlendis þar sem færri virðast vilja leigja íbúð en kaupa.

Ragnar ÁrnasonHugmyndir  Ragnars snúa að þeim sem ætla að eignast sína fyrstu íbúð.  Í flestum tilvikum er um ungt fólk að ræða. Eðlilega á það ekki mikið eigið fé, hefur ekki mjög háar tekjur og á því erfitt með að fá bankalán til kaupanna. Ragnar stingur upp á að komið verði á fót fjárfestingarsjóði íbúðarhúsnæðis sem allt eins gæti heyrt undir Íbúðalánasjóð. Hann kæmi til með að úthluta fastri upphæð til þeirra sem eru að kaupa í fyrsta sinn. Það framlag yrði eignarhlutur sjóðsins í fasteigninni og rynni að sjálfsögðu til hans þegar og ef íbúðin yrði seld.

Í máli sínu nefnir Ragnar dæmi um íbúð sem kostar 20 milljóna króna. Í því tilviki fengi einbúi til dæmis 3 milljónir úr sjóðnum en sambýlisfólk 6 milljónir. Með þessu móti lækkar fjármagnskostnaður kaupenda.

Möguleikar ungs fólks á að eignast íbúð hafa ævinlega verið fáir hérlendis og leiðin að því torsótt. Árum saman hefur verið fetuð sama slóð eða svipuð. Hugmyndir doktorsins eru nýjar og eiga alla athygli skilið. Einstaka menn eru þegar byrjaðir að tala þær niður eða skæla þær. Þess vegna er nauðsynlegt að verkalýðshreyfingin og alþingi taki húsnæðismálin til umræðu enn á ný og vegi tillögur doktorsins og meti á málefnalegan hátt.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
1,640