Úlfar Þormóðsson 19/04/2017

Snilld

Það er ókyrrð í heiminum. Og ofbeldi. Rétt eins og verið hefur í árþúsund. En nú fréttum við af ótuktarskap oftar og fyrr en áður; stundum sjáum við myndir af ofbeldi um leið og það er haft í frami, hvort sem það á sér stað í Flórída eða Frakklandi, Súrinam eða Svíþjóð.

Óvættur

Í Stokkhólmi ók sálsjúkur maður vörubíl um göngugötu, limlesti fólk og drap. „Hryðjuverkaógnin færist nær,“ hrópuðu hræddu karlarnir í Fljótshlíðinni og hófu samræmt blaður, gamalt, um að efla Nató, auka landamæravörslu og vopnvæða íslensku lögregluna. Í kjölfar málflutnings þeirra lét sérsveit lögreglunnar umheiminn vita af því að hryðjuverkamenn væru óvelkomnir hingað. Og sveitin fylgdist svo vel með í flugstöðinni á Keflavíkurflugvelli að enginn öfgamaður þorði að koma til landsins. Ekki einu sinni flugdólgur. Og nú, tæpum tveimur vikum síðar, er svo komið að nálægðin hefur fjarlægst okkur, hættan er liðin hjá. Sjálfur ríkislögreglustjóri staðfesti þetta með eigin orðum í Fréttablaðinu í dag 19. 04.´17 undir fyrirsögninni Dregið úr eftirliti lögreglu á ný. Síðan kemur meginmál; þar er þetta helst:

„Ekki er talin þörf á að halda áfram auknu eftirliti hér á landi vegna hryðjuverka, segir Haraldur Johannessen ríkislögreglustjóri … „Þetta er síðasti dagurinn í dag. Það var okkar mat að það væri ekki þörf á auknu eftirliti lengur,“ segir Haraldur og bætir við að ekkert bendi til að ódæðisverk séu yfirvofandi.“

Þarna er hin sanna herkænska, snilldin tæra. Svona á að verjast. Auglýsa í fjölmiðlum. Tilkynna: Nú eru fáir á vaktinni og allir velkomnir.

Verst ef þeir verða rosalega hræddir, karlarnir í Fljótshlíðinni.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,861