Úlfar Þormóðsson 13/08/2016

Slægð

Framsóknarmenn vilja ekki halda kosningar í vetrarbyrjun. Þeir eiga bágt. Pólitískt. Málefnastaðan er slæm. Formaðurinn er farinn og kominn og jafnvel farinn aftur. Eigi að síður hefur varaformaður flokks þeirra og forsætisráðherra heitið því að kosið verði 29. október. Segir að það hafi verið samþykkt mótatkvæðalaust í ríkisstjórn.

Gunnar Bragi Sveinsson

Svo stígur annar ráðherra fram, Gunnar Bragi, og segir að þetta sé óráð. Og hafi aldrei verið samþykkt í ríkisstjórn. Hann vill ekki láta kjósa fyrr en þá miklu seinna. En hann veit að sjónarmið hans verður undir. Og hann veit að málefnastaða flokksins er ömurleg. Hann veit að flokkurinn þarf meiri tíma og næði til þess að semja loforðaskrá sem kynni að freista kjósenda. Og hann veit líka að flokkurinn er í þeim tætlum að hann getur ekki tekið þátt í vitrænni pólitískri umræðu á næstu vikum og mánuðum.

 

Við þessu er bara eitt ráð. Það er gamalt og hefur aldrei brugðist ef því er rétt beitt. Og hann fann það, Gunnar Bragi. Kannski sjálfur og einn, kannski á laumufundi í Garðabænum á dögunum með þeim Lilju Dögg og Sigmundi Davíð.

Þetta er gamla ráðið: Að láta eitt mál yfirtaka alla umræðu. Og hann er strax byrjaður að sá. Og tala.

Vísir.is hefur þetta eftir honum í dag, 13.08.´16: „Auðvitað höfum við það svo sem alltaf í hendi okkar stjórnarmeirihlutinn að bara kalla saman nýtt þing og hætta við kosningar ef stjórnarandstaðan ætlar að móast við,“ segir hann orðrétt, heillindamaðurinn.

Miðað við málflutning háværra alþingismanna í vor og sumar gæti þetta gamla bragð heppnast enn einu sinni. Og það mun gerast ef stjórnarandstaðan gín við agninu og fer að röfla um dagsetningu sem þegar liggur fyrir í stað þess að hefja pólitíska umræðu um landsins gagn og nauðsynjar í nútíð og framtíð.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,796