Úlfar Þormóðsson 22/12/2015

Sjónhverfing við sólhvörf

Jón Sigurðsson stóð við hliðina á mér á meðan ég reykti. Ég hugsaði um skammdegið. Við horfðum báðir til sömu áttar. Með skakka auganu sá ég pelsklædda konu nálgast. Mér sýndist þetta vera Vigdís Hauksdóttir og fór að hugsa um Viðskiptaráð.

Vigdís HauksdóttirSamkvæmt því sem segir á heimasíðu þess er megintilgangur ráðsins að gæta hagsmuna viðskiptalífsins, efla skilning almennings á mikilvægi frjálsræðis í viðskiptum, lágmörkun opinberra afskipta, hagfellds skattaumhverfis og annarra þátta er miða að því að auka samkeppnishæfni. Ráðið hefur alla tíð verið uppspretta nýrra hugmynda með ótvíræðum árangri og má tvímælalaust rekja mörg af stærstu framfaraskrefum í viðskiptasögu landsins til frækorna sem sáð hefur verið af Viðskiptaráði Íslands, segir það um sjálft sig.

Sáðmaður Viðskiptaráðs gekk út að sá frækornum djúphyglinnar í síðustu viku. Þegar sæðið vex og dafnar á það það að bera þann ávöxt að ÁTVR og Íbúðalánasjóður hverfi af verksviði, víki fyrir frjálsum athafnamönnum, og stofnunum ríkisins fækki úr 188 í 70. Þetta mun gerast með ýmsum tæknibrellum. Þessu til viðbótar verður embætti Umboðsmanns skuldara aflagt og Þróunarsamvinnustofnun lögð niður. Ráðið hefur þegar fengið reynslu af Bankasýslu ríkisins og þeim töfum og troðningi sem hún veldur með hnýsni sinni og afskiptasemi og vill eindregið að henni verði lokað og skellt í lás.

Þar sem ég sat og reykti og sá hinn hraðvirka formann fjárlaganefndar nálgast með þinghúsið í baksýn rifjaðist upp fyrir mér að hann hafði lýst ánægju með og áhuga á tilögum Viðskiptaráðs.  Ég ákvað því að spyrja hann útúr og stóð upp, drap í sígarettunni og kinkaði kolli til Jóns. Svo gekk ég til móts við formanninn, lagaði gleraugun og sá þá að þetta var ekki Vigdís, heldur ung og fögur kona með óræðan svip framtíðarinnar; þetta var sjónarspil við sólhvörf.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,756