Úlfar Þormóðsson 08/09/2016

Sjónhverfing í útveri

Þorgerður Katrín Gunnarsdóttir, fyrrverandi varaformaður Sjálfstæðisflokksins og verðandi frambjóðandi Viðreisnar var í Kastljósi Sjónvarpsins í gærkveldi. Hún sagðist hafa verið í eins konar endurhæfingu sem manneskja og pólitíkus síðan hún dró sig í hlé frá stjórnmálum. Hún virtist einlæg, var yfirveguð og talaði hlýlega um sinn gamla flokk og sína fornu félaga. Og hún er ekki að kljúfa Sjálfstæðisflokkinn. Sagði hún. Og það gæti verið rétt hjá henni.

GhasemMohammadi2014Í morgun las ég þetta haft eftir henni í Fréttablaðinu: „Ég horfi ekki á þetta sem klofning frá Sjálfstæðisflokknum heldur einfaldlega er verið að finna farveg fyrir frjálslyndu öflin til þess að þeirra sjónarmið heyrist aðeins hærra heldur en hefur verið á umliðnum misserum.„

Með hliðsjón af einlægni Þorgerðar í Sjónvarpinu er rétt að taka mark á því sem hún sagði þar. En þá leyfist líka að spyrja: Ef það er ekki klofningur, þegar fyrrverandi formaður, varaformaður og fjöldi trúnaðarmanna ganga úr flokki og stofna annan eins til þess að fljúgast á við hann um sömu atkvæði, hvað er það þá?

Við þessari spurningu eru ekki mörg svör. Reyndar aðeins eitt. Þetta: Hinir brotthlaupnu eru að stofna útver þaðan sem róið verður með nýja beitu á gömlum krókum. Aflanum verður svo landað í friðarhöfn, hjá (Sjálfsstæðis)Flokknum fljótt eftir kosningar.

Sjálfur formaður Flokksins veit þetta enda sagði hann hinn rólegasti á ljósvakanum í gærkveldi um upphlaup Þorgerðar og fleiri: Sjálfstæðisflokkurinn skiptir ekki um skoðun! Og þetta er ljóst: Ef það er ekki klofningur, þegar menn ganga úr liði sem skiptir ekki um skoðun og setja saman annað lið með nýtt yfirbragð og gamalt undirlag því til höfuðs, þá er það sjónhverfing. Það er verið að blekkja einhvern.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,722