Sjálfstæðisflokkurinn ræðst gegn málfrelsi

Sjálfstæðismenn hafa magnað upp gjörningaveður gegn sjálfum sér og flokknum. Þeir hrekjast fyrir vindi, hrata um hverja þústina af annarri og finna ekki skjól.

Um helgina komst upp um hug eins þingmanns flokksins og aðal hugmyndafræðings til innflytjenda. Þar var mikið svartnætti.

Í morgun falsaði hinn nafnlausi leiðarahöfundur Morgunblaðsins eigin skrif. Í leiðaranum stendur: “Vinstri grænir …(halda  því) fram í stefnu flokksins að hann ætli ekki hækka skatta á almenning á Íslandi …. Þegar betur er að gáð … þýðir þetta að flokkurinn hyggst halda áfram þeim stórkostlegu skattahækkunum sem hann stóð fyrir á árunum 2009 til 2013.” Þetta eru ekki mjög sannfærandi skrif og ekki góður dagur án Guðnýjar.

En áfram fauk dagurinn.

Vefmiðillinn Stundin greindi frá því að “Bjarni Benediktsson hafi gert framvirka hlutabréfasamninga við Glitni sem hann tapaði miklu á. Lehman Brothers, Morgan Stanley og Danske Bank voru bankarnir sem hann valdi í von um skammtímahagnað af hlutabréfaverði þeirra. Á endanum tók faðir Bjarna yfir rúmlega 100 milljónir af persónulegum skuldum vegna viðskipta hans,” segir í miðlinum. Þá hefur Stundin einnig greint frá því að gögn úr Glitni, sem mið­ill­inn hafi undir höndum, sýni að Bjarni hafi verið virkur þátt­tak­andi í við­skiptum aflands­fé­lags­ins Falson, sem hann átti hlut í.

Það sáu góðir sjálfstæðismenn að svona mættu hlutirnir ekki ganga svo skömmu fyrir kosningar. Varnarliðsmenn flokksins í kring um eignarhaldsfélag gamla Glitnis fóru fram á lögbann á birtingu frétta upp úr þeim gögnum sem Stundin og Reykjavík Media hafa undir höndum og kröfðust þess að gögnin yrðu tekin af þeim. Hefur sýslumaðurinn á höfuðborgarsvæðinu setti lögbann á fréttir upp úr skjölunum, en náði ekki gögnunum því blaðamenn Stundarinnar neituðu að afhenda þau. Þá hafa og varnarliðsmenn flokksins kært málið til Fjármálaeftirlitsins.

Og dagurinn ekki búinn. Á Englandi er The Guardian með öll sömu gögn og Stundin og Reykjavík Media. Þaðan hafa ekki enn (kl 18:58) borist fréttir af því hvað varnarliðsmennirnir hyggjast gera þar í landi til þess að stöðva málfrelsið.