Sigmundur Davíð lofar vitaskuld nýrri „leiðréttingu“ fyrir næstu kosningar. Íslenska leiðin er tóm hringavitleysa

Verðbólgan færir fjármuni frá hinum efnaminni til hinna ríku. Það er hin sígilda leið til að láta íslensku krónuna „bjarga“ okkur.

Þetta var kjarni máls Benedikts Jóhannessonar, athafnamanns, útgefanda og sjálfstæðismanns til áratuga, í sjónvarpsþættinum Ritstjórarnir á Hringbraut í gærkvöldi.

Þar kom til umræðu viðbúin verðbólga eftir kjarasamninga liðinna mánuða – sem ekki sér fyrir endann á – og Benedikt hafði meðal annars þetta að segja um alvöruna sem fylgir verðbólgunni:

„Stjórnmálamenn munu svo koma fram og segja: „Nú vorum við heppin. Við höfðum krónuna sem okkar bjargvætt.“ Það er að segja, krónuna, sem stelur frá þeim fátækari, það er að segja öllum almennningi, og færir til kaupmátt til þeirra ríku, það er að segja útflutningsgreinanna. Svo munu sömu stjórnmálamenn – alveg án þess að þeim stökkvi bros á vör – þeir munu segja, almenningur þarf, fyrir þessa verðbólgu, að fá „leiðréttingu“. […] Þetta er náttúrlega hringavitleysa.“

Stikla úr þættinum er hér, en hann og aðrir þættir á Hringbraut eru smám saman aðgengilegir á vef sjónvarpsstöðvarinnar.