Úlfar Þormóðsson 30/05/2015

Siðprýði nafnleysingjans

Fimmtudaginn, 28. maí, var fjögurra dálka frétt á forsíðu Morgunblaðsins, Seldir án lagaheimildar, að viðbættri tveggja lína undir undirfyrirsögnin.

Í greininni sem fylgdi segir að blaðið hafa undir höndum umsögn þar sem  „er fullyrt að þáverandi fjármálaráðherra, Steingrím J. Sigfússon, hafi skort lagheimild til að framselja eignarhluti ríkisins í Arion banka og Íslandsbanka í hendur slitabúum föllnu bankanna 2009.

Veiðimaður

Sum sé; Steingrímur J. lögbrjótur og í ljótum málum. En dagur var ekki að kveldi komin þegar aðrir miðlar höfðu sýnt var fram á að Moggamenn höfðu rangt fyrir sér og framsal bankanna gert með löglegum hætti.

Föstudaginn 29.05. birti Moggi tveggja dálka frétt á blaðsíðu bls. 19. Þar er skýrt frá því að Fjármála- og efnahagsráðuneytið vísi á bug fullyrðingu Bankasýslu ríkisins um að starfsmenn núverandi fjármálaráðherra hafi gengið út fyrir verksvið sitt, en ítrekar að skort hafi lagaheimild til að framselja eignarhluta ríkisins í Arion banka og Íslandsbanka í hendur slitabúa föllnu bankanna árið 2009.

En Moggakörlunum þótti ekki nóg að gert gegn Steingrími J. sem hafði þó verið hreinsaður af ásökunum varðandi valdníðslu og lögbrot. Þann sama dag sest nafnleysingi við tölvu og semur Reykjavíkurbréf sem birt er í blaðinu í dag, 31. maí 2015. Það er samsetningur fullur af hrati.

Um Steingrím J. segir: „Nýlegar yfirlýsingar Bankasýslu ríkisins styrkja nú mjög grunsemdir sem lengi hafa verið uppi um að ekki hafi aðeins verið brákir í pottum þegar Steingrímur færði kröfuhöfum, án umræðu og án fyrirliggjandi lagaheimildar, tvo stærstu banka þjóðarinnar…Fróðlegt verður að fylgjast með þróun þessa máls á næstu dögum og vikum. Í því orkar flest tvímælis, svo ekki sé meira sagt: Samráðsleysi, aðkomuleysi almennings, lögleysi gerðarinnar, athugunarleysi á fjárhagslegum þáttum, þátttökuleysi Ríkisendurskoðunar, athugunarleysi þingsins, alþjóðlegt ráðgjafarleysi, efnahagslegt heilsuleysi og þekkingarleysi ráðherranna tveggja sem mesta ábyrgð báru. En í öllu þessu allsleysi stendur eitt upp úr og heimtar athygli: Hið fullkomna siðleysi.“

Fyrir nokkrum árum hætti ég að hlusta á útvarp Sögu og sagði upp Mogganum til þess að forða mér undan þunglyndi sem á mig sótti þegar ég hlustaði eða las. Heilsan batnaði það mikið að ég gat fljótt byrjað að lesa Neta-moggann án aðsóknar svörtu fuglanna. Þar sem áskrifendum blaðsins fer fækkandi frá degi til dags hafa eigendurnir gripið til þess ráðs, þegar mikið liggur við að koma boðskap á framfæri, að dreifa blaðinu í hvert hús. Ókeypis. Og hann barst mé í morgun. Mogginn. Óumbeðið. Með Reykjavíkurbréfi nafnleysingjans, fullu af óhróðri.

Um leið og ég brýt saman blaðið sem ég vil ekki kaupa, á meðan svörtu fuglarnir hnita í hringi yfir mér, get ég ekki hætt að hugsa um lokaorð Reykjavíkurbréfs nafnleysingjans, mannsins sem rís ekki undir nafni, mannsins sem hefur ekki burði til að standa við orð sín: „Hið fullkomna siðleysi.“

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
1,097