Samkórinn

Það safnast sífellt fleiri í kórinn. Samkórinn. Þar er æft og sungið eitt lag. Aðeins eitt einasta lag. Einn texti: Fellum gengið.

Forsendur textans er æðibuna. Æðibuna blönduð græðgi, blindu og tillitsleysi. Textinn er unninn upp úr viðskipahagfræði sem í raun er ekki fræðigrein fremur en annar skáldskapur. „Fræðingarnir“ tala við sína líka, menn og konur með sömu skoðun, mæla ranghugmyndirnar upp hver í öðrum og dreifa þeim á netinu. Senda þær til dagblaða sem prenta þær, til útvarpsstöðva sem flytja þær, sjónvarpsstöðva sem myndskreyta þær og senda þær síðan út. Til okkar. Okkar sem eigum að trúa þeim.

Við sem fengið höfum yfir okkur tugi gengisfellinga vitum hvaða afleiðingar þær hafa. Vitum að þær flytja fé frá ríkissjóði og launamönnum til þeirra sem stunda sölu á vöru og þjónustu sem greidd er með erlendri mynt. Við vitum að með gengisfellingu hækkar vöruverð, verðbólga eykst, kaupmáttur rýrnar og verðtryggðu húsnæðislánin hækka. Við stöndum verr eftir gengisfellingu en fyrir hana, við, almenningur, allur þorri manna. Hins vegar eykst gróði útgerðarinnar, fisksölunnar, flugfélaganna, verslunarinnar og ferðabransans.

Nú eru „fræðimennirnir“ að reyna að lokka lífeyrissjóðina í samkórinn. Það er verið að telja þeim trú um að eignir þeirra erlendis rýni þessi reiðinnar býsn ef gengi krónunnar er svo hátt sem það er, hvað þá ef það styrkist meira. Þetta er fullyrðing. Órökstudd. En ósannindin koma ekki í ljós nema litið sé lengra en nefið nær. En það er ekki háttur viðskiptahag“fræðinga“. Þeir horfa niður, þeir sem ekki eru blindir. Þeir vita ekki hvað þeir eru að gera en gera það eigi að síður.

Samkórinn var ekki mjög fjölmennur fyrir alþingiskosningarnar í haust. Ekki mjög hávær. En hann var byrjaður að kyrja. Og það skýrt að þeir hefðu mátt heyra það frambjóðendurnir. En enginn þeirra tók undir, enginn andmælti að heldur; þeir þögðu.

Og þeir þegja enn, þingmennirnir. Rétt á meðan þeir eru að mynda stjórn. Svo kemur að því. Þeir ganga í kórinn, samkórinn. Taka sér stöðu fremst á sviðinu. Síðan fella þeir gengi krónunnar. Og sitt eigið, sinn eigin verðugleika.