Úlfar Þormóðsson 11/08/2016

Rétt andlit

Formaður Sjálfstæðisflokksins, sem svelt hefur velferðina í þrjú ár, lýsti því yfir á dögunum að á næsta kjörtímabili yrði að taka til höndum og endurreisa heilbrigðiskerfið, byggja nýjan Landsspítala og fleira í þeim dúr.

Bjarni BenediktssonVonandi var hann ekki að tala um hug sér, formaðurinn, því að nú reynir á hann og stuðningsmenn hans í flokknum. Það háttar nefnilega þannig til að maðurinn, sem hóf niðurbrot heilbrigðiskerfisins á uppgangstímum með það fyrir augum að einkavæða það, vill ná endurnýjuðum frama. Það er sami maður og berst fyrir því að allt sé „uppi á borðum“ sem varðar fjármál, sá sami sem hefur ekki enn gefið upp hverjir borguðu miljónatuga baráttu hans við síðustu kosningar. Maðurinn sem sagði í Sjónvarpinu í gærkveldi að það væri nær að breikka brýrnar á þjóðveginum en að setja miljarða í byggingar yfir hið opinbera; en það er akkúrat sami maður og flutti svohljóðandi tillögu við afgreiðslu síðustu fjárlaga rétt fyrir jólin: „Lagt er til 75 m.kr. framlag til að hefja undirbúning og hönnun að 4.500 fermetra skrifstofubyggingu fyrir Alþingi … Samkvæmt frumkostnaðaráætlun er reiknað með að heildarkostnaður við bygginguna verði um 2,3 mia.kr. og að hún verði reist á árunum 2017-2019.

Glæný stúdíómynd af þessum manni birtist á mbl.is nú síðdegis, 11.08.´16. Þetta er að sjálfsögðu enginn annar en Guðlaug­ur Þór Þórðar­son, fyrr­ver­andi heil­brigðisráðherra. Hann ætlar, enn á ný, að gefa kost á sér til þingsetu í fyr­ir­huguðu próf­kjöri sjálf­stæðismanna í Reykja­vík.  Aðspurður hvaða sæti hann setji stefn­una á seg­ist hann stefna á for­yst­u­sæti.

Landsbanki, Guðlaugur ÞórOg hvað þýðir það, forystusæti? Samkvæmt flokkshefð sjálfstæðismanna merkir það ráðherrasæti. Hann vill verða ráðherra á ný. Hann ætlar sér það. Kannski heilbrigðisráðhertra, hver veit?

En framtíð hans veltur á sjálfstæðismönnum. Nú reynir á þá. Þeir þurfa að ákveða hvort þeir vilji frekar styðja nýja uppbyggingarætlan formannsins eða endurkomu niðurrifamanns  velferðarkerfisins. Og líka hvort þeir vilji þingmann sem kostaður er með peningagjöfum frá huldumönnum úti í bæ, hvort þeir vilja þingmann sem segir eitt fyrir jól og annað stuttu fyrir kosningar, hvort þeir vilji yfirleitt … já, hvort þeir vilji Guðlaug Þór í ráðherrastól.

Niðurstaðan í prófkjöri sjálf­stæðismanna í Reykja­vík verður óumflýjanlega yfirlýsing um hug þeirra til velferðarsamfélagsins. Þar gefst þeim kostur á að sýna sitt rétta andlit. Ef þeir vilja þá láta sjá það. Þetta verður gagnlegt fyrir almenna kjósendur.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
1,012