Ritstjóri Herðubreiðar 05/09/2016

Rannsaka kjörstjórnir pírata hver kaus hvern í prófkjöri? Svo virðist vera

Svo virðist sem fulltrúar í kjördæmisráðum pírata geti séð hvernig tilteknir einstaklingar greiða atkvæði í prófkjörum flokksins.

Það er ályktun Sigríðar Á. Andersen, þingmanns Sjálfstæðisflokksins, sem dregur hana af þessum orðum einstaklings í kjördæmaráði pírata í norðvesturkjördæmi í viðtali við Ríkisútvarpið sl. laugardag:

„… Hann gekkst við því meðal annars að hafa fengið, eins og hann orðaði það, nokkra félaga, 20-30 manns, til að skrá sig í flokkinn til þess að kjósa sig og samkvæmt þeim tölfræðigögnum sem voru birt um kosninguna, þá kusu 18 af þessum eingöngu hann og engan annan í prófkjörinu en fólki var frjálst að raða öllum sem að voru í framboði á kjörseðil hjá sér.“

Þessi umræddi „hann“ er frambjóðandinn sem fékk flest atkvæði í fyrsta sæti og sigraði því. Þeirri niðurstöðu hafa píratar á landsvísu nú hnekkt, þótt viðurkennt sé að frambjóðandinn hafi ekki farið á svig við reglur.

Af ummælum fulltrúans í kjördæmisráðinu verður ekki annað merkt, en að þeir hafi aðgang að og geti rannsakað hvernig einstakir kjósendur greiddu atkvæði.

Það eru nýmæli, ef rétt reynist, og eins og Sigríður orðar það: „Í ljósi áherslu Pírata á friðhelgi einkalífsins lítur þetta eitthvað undarlega út.“

Flokkun : Efst á baugi
0,824