Rafmagnsleysi á Austurlandi líkt og skortur á klaka á Suðurpólnum. Er Björk og Hagkaupsbörnum um að kenna?

Forseti bæjarstjórnar í Fjarðabyggð, Jens Garðar Helgason, segir rafmagnslínu yfir Sprengisand lífsnauðsynlega fyrir Austfirðinga. Annars sé yfirvofandi reglubundinn raforkuskortur líkt og sá sem nýlega kostaði bæjarbúa fimmtán milljónir króna.

Frá þessu segir í Austurfrétt.

Bæjarfulltrúinn segir Austfirðinga vana að eiga við náttúruverndarsinna, sem eru andvígir lagningu línu yfir Sprengisand, og nefnir sérstaklega til sögunnar „Hagkaupsbörnin og Björk, sem berjast gegn framkvæmdum eins og þessum og fleiri virkjunum.“

Rithöfundurinn Andri Snær Magnason segir í pistli af þessu tilefni að raforkuskortur á Austurlandi sé á við bensínskort í Saudi Arabíu eða klakaleysi á Suðurpólnum:

„Á Austurlandi er framleidd raforka sem ætti að duga milljón manns eftir að 670 MW Kárahnjúkavirkjun var tekin í notkun en samkvæmt þessari frétt er raforkuskortur á Austurlandi og sækja þyrfti orku ,,suður“. Hér er á ferðinni stórmagnað dæmi um hinn eilífa skort. Þú hefur tvöfaldað skuldir Landsvirkjunar og tvöfaldað orkuframleiðsluna, þú hefur rústað Lagarfljóti og hálendinu norðan Vatnajökuls, efnt til þjóðarrifrildis – og þú hefur ekki fengið nóg – það þarf að skera hálendið í tvennt. […]

En það eru nokkrir hlutir sem ætti að skoða í þessu samhengi. Ef línan yfir Sprengisand felur í sér offjárfestingu upp á 15 milljarða – er hún réttlætanleg til að spara 15 milljónir á ári?

Er réttlætanlegt að skera hálendið í tvennt – vegna þess að tíunda hvert ár er slæm vatnsstaða svo grípa þarf til olíukyndingar í nokkrar vikur?“

Og ennfremur: „Það er ekki skortur á raforku á Austurlandi. Alls enginn. Jafnvel þótt Kárahnjúkavirkjun hefði ekki verið byggð – væri ekki skortur. Þótt lagt verði stóriðjunet kringum landið er ekki einu sinni víst að bæir undir línunni fái þriggja fasa rafmagn og að aldrei slái út á Djúpavogi. Dreifðar byggðir munu áfram lenda í vandræðum með ísingu og Sprengisandur tengist ekki veikum hlekkjum í línum út á Langanes eða Hólmavík og fjárfestingin gagnast ekki óöruggasta hluta kerfisins sem eru Vestfirðir. Þar eru menn ekki reiðir út í Björk. Þeir voru að klára flottustu rokkhátíð landsins – Aldrei fór ég suður.“