Ritstjóri Herðubreiðar 07/10/2015

Ráðinn án auglýsingar. Fer þó fyrst á landsfund Sjálfstæðisflokksins

Svo sem kunnugt er hefur Hörður Þórhallsson verið ráðinn framkvæmdastjóri Stjórnstöðvar ferðamála. Það var gert án þess að starfið væri auglýst, sem er raunar ekki skylt þegar um er að ræða tímabundna ráðningu eins og í þessu tilviki.Hörður Þórhallsson

Það var þó ekki ástæðan sem Ragnheiður Elín Árnadóttir ferðamálaráðherra gaf, aðspurð hvers vegna starfið hefði ekki verið auglýst. Hún sagði Hörð slíkan yfirburðamann að ekki hefði verið nokkurt tilefni til að skoða aðra kosti. Hann væri hrein himnasending. Hún var hins vegar ekki spurð hvort hún teldi að Hörður hefði orðið undir í samkeppninni, ef umsækjendur hefðu verið fleiri.

Vefritið Stundin greinir frá því að Hörður sé skráður fulltrúi á landsfund Sjálfstæðisflokksins, sem fram fer síðar í mánuðinum. Einungis skráðir félagar í flokknum hafa seturétt á landsfundi. Blaðið birtir einnig mynd þar sem Hörður situr að kvöldverði með nokkrum framámönnum í Sjálfstæðisflokknum á einkaheimili eins þeirra.

Þrátt fyrir þetta neitar Hörður að hafa nokkur tengsl við Sjálfstæðisflokkinn og svarar einfaldlega „Nei“, aðspurður um hvort þau séu til staðar.

Það afdráttarlausa svar virðist ekki ríma við staðreyndir og veruleika.

Flokkun : Efst á baugi
1,055