Ráðherra svíkur langveik börn

 

Maður sem ég þekkti ungur var orðinn hjartveikur af lífinu. Konan hans var veik og þurfti mikla umönnun allan sólarhringinn. Hún fékk ekki inni á hjúkrunarheimili við hæfi svo að maðurinn varð að annast hana þó svo að hann hefði ekki burði til þess. Hann lést fyrir nokkrum vikum. Konan lifir mann sinn án þess að vita af því.

Landspítalinn er fullur af sárveiku fólki. Það liggur á göngum og í geymslum. Þar er því ætlað að ná heilsu í iðandi umferð undir bláma neonljósa.

Bára Sigurjónsdóttir, sérfræðingur í barnahjúkrun M.Sc. og forstöðumaður Leiðarljóss, stuðningsmiðstöðvar fyrir börn með sjaldgæfa, alvarlega og ólæknandi sjúkdóma skrifar grein í Fréttablaðið í dag, 19.12.2016. Þar segir hún frá því að  stjórnvöld hefðu lofað því að taka við rekstri miðstöðvarinnar þegar söfnunarfé þess þryti. Nú eru peningarnir uppurnir.  Áðu en svo var komið endurnýjaði Kristján Þór Júlíusson, heilbrigðisráðherra loforðið um að ríkið myndi greiða rekstrarkostnað stöðvarinnar, sem er 27 milljónir á ári. Hann beitti sér fyrir því að 12 miljónir færu í verkefnið sem er innan við helmingur þess sem þarf og lofað var. Þetta þýðir, segir Bára, „að stuðningsmiðstöðin Leiðarljós, sem nú þjónar 75 fjölskyldum, mun líða undir lok. Þetta finnst mér margföld svik við gefin loforð.“

Kristján Þór Júlíusson hefur vanrækt heilbrigðismálin í fjögur ár. Svelt þau af peningum. Hann hefur hins vegar lofað bót og betrun. Margoft. Efndir eru litlar sem engar. Í nýafstöðnum alþingiskosningum hlaut Kristján verulegt fylgi í sínu kjördæmi; reyndar mun meira fylgi en gert var ráð fyrir. Því er ekki úr vegi að velta því fyrir sér á hvaða forsendum hann hlaut stuðninginn; hvort hann hafi lofað að endurreisa heilbrigðiskerfið eða eyðileggja það, hlúa að fólki eða vanrækja það og draga úr aðhlynningu og hjúkrun barna.

En til þess að getgátur séu ekki uppi hafðar um hvað ráðherrann ætlar sér með heilbrigðiskerfið er þess farið á leit, að hann skýri frá því hvað hann ætlar sér og hvernig hann ætlar að fara að því. Ef hann þegir, eins og hann oft gerir þegar hann er spurður, gæti einhver sem hlustaði á hann í kosningabaráttunni og kaus hann í hrifningu útskrýrt fyrir okkur hinum hvaða loforð voru gefin.