Píratar boða hugbúnað til að auðvelda undirskriftir gegn þingmálum. Kynnt í þingræðu á eldhúsdegi

Helgi Hrafn Gunnarsson þingmaður Pírata kynnti í kvöld væntanlegan hugbúnað sem ætlað er að einfalda og gera öruggari undirskriftasafnanir gegn þingmálum.

Þetta gerði hann úr ræðustól þingsins í venjubundnum eldhúsdagsumræðum.

Píratar kalla hugbúnaðinn Öryggisventilinn og segja markmiðið með honum að mæla óánægju meðal þjóðarinnar með þau þingmál sem reynast umdeild.

Öryggisventillinn safnar sjálfkrafa gögnum um þingmál sem hafa verið lögð fram á yfirstandandi þingi hverju sinni. Almenningi gefst því kostur á að hefja undirskriftasöfnun gegn samþykkt hvers þingmáls um leið og það birtist á vef Alþingis. Vilji notandi skrifa undir mótmæli smellir hann á takkann „Mótmæla!“ og staðfestir skráningu sína með svokölluðum Íslykli, en hann er notaður til auðkenningar gagnvart ýmsum aðilum, þar á meðal hinu opinbera.

Með þessari tækni er ætlunin að tryggja öryggi við rafræna undirskriftasöfnun sem áður var ekki möguleg.

Píratar boða að hugbúnaðurinn verði kominn í gagnið þegar þing kemur aftur saman í haust.