Ósannindamaðurinn

Forsætisráðherra landsins hefur farið mikinn síðustu daga og talað frá sér vit og rænu eins og sagt er um þá sem fara með þrugl og þylja skæting.

Hann segir: … „skynjun fólks á raunveruleikanum er röng… að rof á milli raunveruleika og skynjunar hjá þjóðinni valdi því að ríkisstjórnin er með aðeins stuðning hjá þriðjungi þjóðarinnar.“

… „að í umræðunni sé að misskipting hafi aukist, en það sé ekki raunin. Auk þess sé umræða um heilbrigðiskerfið dæmi um slíkt rof, þar sem fólk segi heilbrigðiskerfið vera fjársvelt, enda hafi fjárframlög aldrei verið hærri til Landspítalans. Hann segir stöðugt verið að færa fram rangar fullyrðingar.“

Honum þykir ekki nóg sagt með þessu. Þruglar áfram, ráðherrann og segir, að „bjartsýni og jákvæðni ætti að vera ríkjandi.“… kveðst sáttur með fyrstu tvö ár kjör­tíma­bils­ins. „Ég get eig­in­lega ekki verið annað því … þró­un­in (hefur) verið það já­kvæð að ég hefði ekki þorað að vona að þetta myndi ganga jafn­hratt í rétta átt eins og raun­in hef­ur orðið.“

Og hann hótar launafólki. Segir „að það kæmi til greina að hækka skatta ef samið yrði um launa­hækk­an­ir í kjaraviðræðum sem ógna stöðug­leika. Ég er ekki að boða þetta. Ég er bara að segja að ef… „

Og loks þetta: … að ríkið „hafi aldrei haft meiri arð af auðlind­um þjóðar­inn­ar en nú. Í flest­um sam­an­b­urðarlönd­um væri sjáv­ar­út­veg­ur jafn­framt rík­is­styrkt at­vinnu­grein, en hér á landi væri grein­in sjálf­bær og arðbær. „Slíkt er fá­heyrt.“

Að fara með þrugl og þylja skæting af þessu tagi stafar annað hvort af þekkingarleysi eða afneitun. Nema að um eðlislæga ósannsögli sé að ræða. Eitthvað sem eymingjans maðurinn ræður ekki við eða gerir sér ekki grein fyrir í siðblindu sinni.

Þó svo að fullyrðingar ráðherrans séu rangar fæ ég mig ekki til þess að elta ólar við bullið sem í þeim felst. Ég get þó ekki stillt mig um að gera athugasemd við þá síðustu. Um sjálfbærni útgerðarinnar.

Staðreynd, sem allir vitibornir menn gera sér grein fyrir, er að fjölmörg útgerðarfélög fá úthlutað kvóta til þess að veiða fiskitegundir sem þau geta ekki veitt. Hafa hvorki veiðarfæri né skip til þess. Þetta er gjafakvóti. Kvóti sem þau selja. Fyrir hundruðir miljóna á ári hverju. Sá peningur fer beint í kassa þeirra. Þetta er gjafakvóti. Ríkisstyrkur. Meðlag frá því fólki sem nú er í verkfalli til þess að reyna að fá mannsæmandi laun fyrir vinnu sína. Undir hótunum.

Í dag er ríkisstjórnin tveggja ára gömul. Vísir.is greinir frá því hvað ráðherra ósannindanna ætlar að gera sér til góða af tilefninu: „Sigmundur Davíð fær sér köku í tilefni dagsins.“