Örbyrgð og afgangur

Samkvæmt frétt í Ríkisútvarpinu í dag, 20. júlí 2015, sem unnin var upp úr rannsókn könnunarfyrirtækisins Maskínu eiga fjöldamargir Íslendingar ekki til hnífs og skeiðar.

Þessa staðreynd er hægt að orða á ýmsan veg. Útvarpið segir tíðindin þannig að tíundi hver landsmaður segi að sig „vanti mikið upp á að hann nái endum saman um mánaðamót.“ Og síðan orðrétt:

„Um 29% segja að endar nái ekki saman. Rúm 32%, segjast eiga nokkurn afgang. Hátt í fjórðungur þeirra sem eru aðeins með grunnskólapróf er fjarri því að afla nægilegra tekna fyrir útgjöldum. … 34,1% sögðust ná endum saman, 32,2% eiga nokkurn afgang en aðeins 4,6% sögðust eiga mikinn afgang. Fjölmennur hópur, eða 18,8%, er nærri því að ná endum saman en 10,3 % segjast langt frá því að takast það um mánaðamót. … Hátt í fjórðungur þeirra sem eru með grunnskólapróf á langt í land með að ná endum saman.

Maskína spurði … líka hvort (svarendur teldu) hag sinn almennt batna eða versna á næstu misserum. Hátt í helmingur (48-49%) telur að hagurinn muni standa í stað en 37-38% telja að hagurinn batni. Næstum 14% telja að afkoman versni. Þeir sem hæstu launin hafa eru jafnframt bjartsýnastir á að hagur þeirra batni. Bjartsýnastir hvað þetta varðar eru kjósendur stjórnarflokkanna.“

Bjartsýni aðdáenda ríkisstjórnarinnar kemur ekki á óvart þegar þess er gætt að könnunin leiðir í ljós að yfir 55% kjósenda Sjálfstæðisflokksins á afgang um hver mánaðamót og framsóknarmenn eru hamingjusamastir allra landsmanna.

Það er hryggileg niðurstaða að fátæklingum fjölgi með moldríkri þjóð á sama tíma og auðmenn gildna og horfa bjartsýnir fram til enn betri tíðar. Og nú er verið að stíga stór skref í einkavæðingu heilbrigðiskerfisins fyrir tilverknað framsóknar- og sjálfstæðismanna. Við það aukast útgjöld hinna veiku, þjóðarhagfóturinn vex, verðbólgan skríður hraðar upp á við og þeim mun fjölga sem vantar mikið upp á að ná endum saman.

Það er ömurlegt líf sem blasir við stórum hópi landsmanna ef draumar og fyrirætlanir núverandi stjórnarflokka ná fram að ganga. Það er þjóðarnauðsyn að koma í veg fyrir það og hrinda ríkisstjórninni frá völdum. Fyrr en síðar.