Óorð
Við erum rík þjóð. Við búum í velferðarsamfélagi. En við erum nísk í augum heimsins. Við höfum skuldbundið okkur til þess að láta ákveðna prósentutölu af þjóðarauðnum renna til fátækra landa, til sveltandi þjóða. En við stöndum ekki við það. Greiðum aðeins þriðjunginn af því sem við höfum lofað að borga.
Við erum rík en nísk í augum heimsins.
En erum við nísk? Ég held ekki. Ég kannast við fjöldann allan af rausnarfólki, en aðeins tvær nískunasir. Samt eru þessir tveir nirflar ekki verr haldnir en svo að þeir myndu rétta ölmusu að þurfandi manni. Ég er sannfærður um það.
Eigi að síður erum við nísk í augum heimsins. Það er ömurlegt. Sökin liggur hjá ríkisstjórninni sem nú situr. Hún hefur komið óorði á okkur. Í oflæti sínu lætur hún sér ekki nægja að brjóta niður velferðina hér innanlands, heimurinn allur er undir. Hún þekkir ekki mannúð. Hún er okkur til skammar.
- Sálumessa - 02/07/2020
- Umhverfisvændi - 21/04/2020
- Er brennivínið besti kostur? - 26/03/2020