Ómöguleiki og upplok

Bjarni Benediktsson, forsætisráðherra vill ekki mæta fyrir þingnefnd, svara fyrirspurnum og gera grein fyrir því af hverju hann faldi skýrslu um skattaskjólseignir fram yfir kjördag. Hann vill ekki heldur ræða það af hverju hann sat á greinargerð fram yfir kosningar þar sem fjallað var um misskiptingu fjár sem útdeilt hafði verið úr ríkissjóði til lækkunar húsnæðisskulda. Og hann vill alls ekki biðjast afsökunar á þessum feluleik.

En hann neitar ekki alltaf að mæta, Bjarni Benediktsson. Og ekki neitar hann alltaf að tala. Það má sjá í fréttatilkynning í Mogga dagsins. Hún er frá Varðbergi, samtökum um vestræna samvinnu. Ef til vill samin af náfrænda Bjarna, Birni Bjarnasyni formanni Varðbergs og fyrrum Hrunráðherra. Þar segir að Varðberg ætli að halda fund í Norræna húsinu í hádeginu á morgun, fimmtudag. Þar mun Bjarni flytja ræðu og svara fyrirspurnum. Efni fundarins er Þjóðaröryggisráð – ný viðhorf í utanríkismálum. Svo skrifar Björn frændi eða einhver einhver annar á varðbergi óttans:

„Unnið er að því að setja á laggirnar þjóðaröryggisráð undir formennsku forsætisráðherra í samræmi við lög sem samþykkt voru í fyrra. Ráðherrann hefur ekki rætt opinberlega um framkvæmd laganna fyrr en nú á fundi Varðbergs.“

Frumflutningur á stefnu ríkisins um þjóðaröryggismál verðu ekki á Alþingi. Hann verður á vegum Varðbergs í hádeginu á morgun. Og hver veit nema Benedikt Sveinsson skjótist úr fjármálaráðuneytinu og fái sér í gogginn undir ræðu frænda síns. Þetta verður þá hvort tveggja Varðbergsfundur og ættarmót; þarna gæti og orðið fróðlegt að vera, því eins og áður segir, ætlar Bjarni ekki aðeins að halda ræðu heldur mun hann líka svara fyrirspurnum.