Ólöglegt en siðlegt

Verkalýðshreyfingin er að efla verkfallssjóði sína. Þetta merkir að hreyfingin býr sig undir harða kjarabaráttu í byrjun nýs árs. Þetta er löngu vitað og ætti að vera kunnugt öllum þeim sem fylgjast með þjóðmálum.

Útgerðin, fiskvinnslan og sölusamtök fiskframleiðenda kvarta yfir háu gengi íslensku krónunnar. Ferðaþjónustan gerir það líka. Kvartanirnar fela í sér ósk um gengisfellingu. Þær óskir munu breytast í kröfu á næstu dögum og vikum. Greiningardeildir bankanna tala um að viðvörunarljós hafi kviknað vegna þess að gengi krónunnar sé of hátt skráð. Krafa um gengisfellingu liggur í loftinu. Þá hækkar verðlag á innfluttum vörum og léttist pyngja launafólks.

Það sem blasir við þeirri ríkisstjórn sem innan tíðar sest að völdum eru átök á vinnumarkaði og gengisfelling í einhverri mynd. Þrátt fyrir þessar augljósu staðreyndir hefur kjararáð sullað bensíni yfir þessa dapurlegu framtíðarsýn. Og borið eld að.

Það er óvíst hvaða kröfur má gera til starfsstjórnarinnar sem nú situr. Hitt held ég að sé ljóst, að henni yrði þakkað fyrir að ógilda þessa nýjustu gjörð kjararáðs. Kannski má hún það ekki. Ef til vill er það ólöglegt. En það væri fullkomlega siðlegt.