trusted online casino malaysia
Ritstjóri Herðubreiðar 10/10/2015

Ögmundur um stjórnarskrármálið: Það var verkstjórn Jóhönnu sem brást. Klúður og vanhugsuð vinnubrögð

Klúður og vanhugsuð vinnubrögð forsætisráðherra urðu til þess að ekki tókst að afgreiða breytingar á stjórnarskránni vorið 2013. Þetta er niðurstaða Ögmundar Jónassonar alþingismanns í grein sem birtist í morgun.Ögmundur Jónasson

Tilefnið er stikla úr nýrri heimildamynd um Jóhönnu Sigurðardóttur, sem frumsýnd verður á fimmtudag.

Ögmundur minnir á, að tillögur stjórnlagaráðs hafi þurft á verulegum breytingum og lagfæringum að halda. Í stað þess að leggja áherslu á þau atriði, sem þjóðin hafði mestan áhuga á, svo sem ákvæði um þjóðaratkvæði og almannaeign á auðlindum, hafi forysta ríkisstjórnarinnar lagt ofurkapp á að afgreiða tillögurnar í heild sinni. Því hafi verið auðvelt verk fyrir stjórnarandstöðuna að stöðva málið.

Ögmundur skrifar:

„Stjórnarráðið neitaði að horfast í augu við að ekki var fyrir því meirihluti á Alþingi að beita þingskapalögum til að höggva á umræðuna um Stjórnarskrána með því að svipta þingmenn málfrelsi og knýja fram atkvæðagreiðslu. Tillögur í þessa veru voru þó ræddar jafn fráleitt og það kann að hljóma. Sannast sagna veit ég ekki hvernig atkvæðagreiðsla um aðskiljanlega þætti stjórnarskrárdraganna hefði farið, jafnvel þótt meirihluti hefði náðst til að knýja hana fram.“

Hann bætir við:

„Meintur „glæpur“ Árna Páls Árnasonar – sem Jóhanna Sigurðardóttir velur sem höfuðsökudólg með óljósari skírskotun til annarra – var að leggja til breytingar sem opnuðu á að unnt yrði tímabundið að breyta stjórnarskránni með hraðvirkari hætti en kveðið var á um. Það vill gleymast að formenn beggja ríkisstjórnarflokkanna og Bjartrar framtíðar stóðu að þessari tillögu.  Hún var samþykkt  og er það ástæða þess að við erum nú yfirleitt að ræða þann möguleika að einhverjar breytingar verði gerðar á þessu kjörtímabili. Ef þessi tillaga hefði ekki náð fram að ganga hefði málið verið algerlega strand. Þetta reyndist því vera skynsamleg tillaga. […]

Ef eitthvað brást í þessu efni þá var það verkstjórnin,  nokkuð sem forsætisráðherrann fyrrverandi hlýtur að þurfa að horfast í augu við.“

Grein Ögmundar í heild er hér.

Flokkun : Efst á baugi
1,383